Ausencia gobierno na eventonan di Gobernador nobo cuestiona

ORANJESTAD - E ausencia di gabinete Mike Eman II completo diabierna anochi na e prome recepcion di Gobernador nobo di Aruba y e presencia di apenas 3 minister un dia prome den reunion solemn parlamentario no a cay den bon tera den comunidad. "Falta di respet', 'muchachada', y 'falta di madurez' ta palabranan cu a zona tanto pa e actonan di diahuebs como diabierna. Mes momento NoticiaCla.com a compronde si, cu dos minister di e gabinete oficialmente a 'disculpa nan mes' pa ambos dia. Pero e resto di Gabinete diabierna anochi a 'briya' cu nan ausencia despues cu apenas 3 a presencia diahuebs den Parlamento. E hecho ta manda un señal fuerte cu 'ainda' cos ta leu di ta bon entre gobierno y e Gobernador nobo, y ta marca e tono di un relacion cu ta spera nan den e periodo nos dilanti. Algun tambe a bisa, pa 'duna tempo, tempo y cu tin speransa cu cos por 'cambia' na caminda.  

GOBERNADOR NOBO

E ausencia di gabinete sea parcial (diahuebs den Parlamento) of completo diabierna anochi na e recepcion, no a stroba Gobernador nobo Alfonso Boekhoudt di haci su trabou. De hecho ambos discurso di e Gobernador (diahuebs y diabierna) a haya elogio y aceptacion completo den comunidad. E hecho cu na ambos ocasion (diahuebs y diabierna) Gobernador a haci mencion breve di e situacion di nombracion y a mustra cu ta ora pa laga esey atras y wak dilanti, ta indica cu e ta conciente di e situacion, pero lo no strob'e di sigui dilanti. Brevemento ela toca e tema di e nombracion diabierna anochi atrobe "Den mi discurso cu mi a duna ayera den Parlamento, m’a tira un bista cortico riba e periodo cu ta nos tras. Esaki riba mi nombramento y e emocionnan cu esaki a trece cu ne pa tur partido envolvi. Un comienso asina no por cualifica como simpel" Gobernador a bisa diabierna nochi. Mes momento ela pidi pa laga esaki atras y sigui padilanti. "Mi ta sigur cu nos, como co-cuidadanonan di nos dushi pais, por fiha nos bista padilanti den forma positivo. Den tur caso, ami lo dedica mi mes 100% na mi funcion como Gobernador di Aruba". Ela splica diabierna tambe e.o. cu mientras cu e no por duna un bista di loke lo pasa den 2017, e por bisa si kico e ta bay haci."Awe nochi mi ta prefera di no duna un panorama tocante Aruba y su desaroyonan actual, pero mi por conta boso si, loke si mi ta bay haci pa cumpli cu mi rol specifico pa nos comunidad" Gobernador a bisa. Aki Gobernador a referi cu elo a bay scucha comunidad. "Siña for di boso y scucha boso. Y cu scucha mi kiermen: para habri pa loke ta tene boso ocupa, boso exitonan, boso problemanan y boso dilemanan". Ademas a mustra cu e tin interes pa e loke ta pasando. "Mi ta bay scucha. Mi ta bay scucha tur loke ta pasando, kico ta e preocupacion, inkietud y problema" Boekhoudt sigui a bisa. Su porta lo keda habri manera cu antecesornan, y lo duna 100% di dje pa efectua su labornan mas miho cu ta posibel. No a sinti ningun momento cu e 'actuacion di gobierno' ta afect'e. 

REACCION DI AUSENCIA

For di momento cu a mira 'apenas' 3 minister den sala di Parlamento diahuebs, comentarionan a cuminsa plama. Gobierno a presenta cu un gabinete minimal den Parlamento, sin cu a duna un splicacion pa esaki, cu excepcion di 2 minister. E ausencia ey sin splicacion hopi a cuestiona. Mientras cu di parti di oposicion (MEP) mesora a atende e asunto cu potret y comentario, mas tabata e comentarionan no politico cu a hala atencion, y cu tabata negativo. Pero ora cu diabierna anochi ningun mandatario di e gabinete a presenta, esnan presente a keda mas sorprendi y no tabatin ningun palabra positivo pa e acto aki. NoticiaCla.com a compronde di fuentenan cu reaccion di gobierno ta cu e eventonan manera e receptie, no ta considera un evento oficial, pues no ta rekeri presencia eynan. Esun di mainta si ta uno oficial unda cu esnan cu tabata por, a presenta e mainta ey. Sinembargo mes un momento, miembronan di gabinete cu tabata presente den sala, no a presenta pafor despues ora di inspeccion di militarnan. Algo cu normalmente ta parti di e ceremonia oficial. 

AUSENCIA DEN PASADO

Mester bisa cu den pasado, pa varios aña, gobierno no tabata presenta na recepcionan di Gobernador Refunjol, of porta aki aya algun minister tabata duna acto di presencia. Tabata aña pasa durante e loke mester a bira e ultimo 'Oranje ball' ofreci pa awor ex Gobernador Refunjol, cu gabinete Mike Eman II completo a presenta. Hopi a mira esaki como un 'despedida' pa e Gobernador saliente di parti di gabinete Mike Eman II. Pues e hecho cu no ta presenta na e recepcion, no ta algo nobo. Pero pa no presenta pa e prome recepcion di e Gobernador nobo, mayoria den sala diabierna anochi a considera como un 'falta di respet', 'muchachada' y algo 'hopi mahos'. Nota. Foto ta di momento cu awor ex Gobernador a caba huramenta actual Gobernador den funcion di minister plenipotenciario na 2013.