Gobierno porfin lo atende discrepancia cobransa coriente pa hotelnan

ORANJESTAD - Gobierno porfin ta bay atende e problema di coriente pa e sector hotelero. Problema den sentido cu hotelnan no ta di acuerdo con e compania di utilidad ta cobrando e hotelnan pa consumo di coriente. Aruba Hotel & Tourism Association (AHATA) tin algun tempo caba (mas di dos aña) ta bringando gobierno riba e tema aki sin por a yega na un solucion. CEO di AHATA Jim Hepple a confirma na NoticiaCla.com e siman aki cu porfin gobierno a confirma cu nan ta bay 'regla e asunto'. "Mi a papia cu e minister (Richard Arends) riba e tema ey y ela bisa cu e ta e punto number 1 of 2 riba nan agenda (pa wordo atendi)" Hepple a bisa. Hepple ta spera cu dentro di poco lo por haya un contesta definitivo riba e asunto ey. 

E SITUACION

E problema di coriente ta cu hotelnan ta wordo cobra a base di e grandura di e propiedad y no e uzo real basa riba e ocupacion di e hotel. Algo cu e hotelnan no ta compronde y no ta haya ta logico. E ta crea gastonan mas halto cu normal, y esey ta afecta nan situacion financiero, strobando nan pa por inverti den mehoracion di e propiedad. Si nan ta wordo cobra mas di loke nan ta consumi, y no ta haya e pago (di e turista) pa esey, e ta bira un problema. Nan kier pa e situacion cambia y nan wordo cobra manera ta coresponde. Si ta 40 camber ta uzando coriente, mester cobra pa 40 camber y no cobra e hotel 100 camber siendo cu ta solamente 40 a uza coriente, p.e. 

EFECTO 

Unabes resolvi, e lo tin un impacto substancial segun Hepple. Esaki pasobra aunke cu gobierno a reduci e tarifa di coriente cu 5% pa comercio. Si logra cambia e proceso di cobransa, e hotelnan lo por tin mas entrada cu nan por inverti den sistema pa conserva energia. Algo cu awor no tin sentido pa haci.