Mohamed: Caya grandi ta y lo keda un problema

ORANJESTAD - Camara di Comercio su directiva nobo tin cu 'tackle' e asunto di Caya Grandi ainda e aña aki. Asina presidente nobo di KvK Ernst Mohamed a contesta NoticiaCla.com riba e situacion cu tin riba e.o. e moratorium cu a wordo pidi pa un grupo di comerciante, pero cu a haya un 'rechaso' di parti di gobierno. "Personalmente mi por bisa cu nos a sinta aña pasa cu e grupo di caya grandi y a scucha nan", Mohamed a bisa. Kier trece nan y gobierno hunto pa asina soluciona e problema. "Caya grandi ta un problema y Caya grandi ta keda un problema. E ta un tiki lamentabel cu ela bay atras asina" e presidente a sigui bisa. 

COMERCIO MESTER FLORECE 

E intencion ta pa den 2017 bin cu un plan con pa tackle e situacion. Actualmente no tin un plan riba mesa ainda. A splica cu un di e problemanan ta e maneho di e concepto di free enterprise, esta comercio liber. Tur hende (comerciante) por haci manera cu nan kier y bende loke nan kier, y economia ta regula su mes. Problema segun Mohamed, ta cu mester por adapta na e cambionan cu tin. Hopi ta papia di e Caya Grandi di antes, siendo cu ta bayendo den 2017 unda cu tempo a cambia. Segun Mohamed, comerciantenan den Caya Grandi mester mira con nan ta bay profila nan mes y den ki direccion nan kier tuma pa competi contra e mallnan grandi cu tin.