Reto pa Gobierno y Gobernador crea confiansa y respet mutuo

ORANJESTAD - Segun Reglamento di Gobernador di Aruba, Articulo 3, Gobernador ta acepta su funcion door di entrega den un Reunion Solemne di Parlamento, un copia di e Decreto Real conteniendo su nombramento y di e proces-verbaal di su huramentacion.  Asina presidente di Parlamento Mervin Wyatt Ras a presenta den su discurso diahuebs ultimo. E presidente a menciona cu ta cumpli cu regla y ley y cu indudablemente esaki ta un dia importante den historia di nos pais, na momento cu nos ta cera conoci cu e di cuater gobernador di Pais Aruba den mas cu trinta aña di nos Status Aparte. 

DISCUSION RIBA PROCEDURA

Segun Wyatt-Ras e hecho cu tabatin discusion encuanto e procedura di nombracion y cu esaki a ser discuti den e Parlamento di  Aruba  como entre e paisnan den Reino no ta un secreto. Sin embargo e decision ta tuma y nos ta cumpli cu esaki y lo bay traha hunto pa un solo meta bienestar di nos pais y nos hendenan. Esaki sigur lo trece cu ne un reto grandi pa nos Gobernador, gobierno y tur esnan envolvi pa crea confiansa y respet mutuo. Esaki ta necesario pa sali na vanguardia di interes di nos comunidad y haci cu otronan por respeta nos. Asina nos por traha hunto pa logra mas igualdad den Reino. 

PARTICIPACION ACTIVIDADNAN DI IMPORTANCIA

Wyatt-Ras ta considera di importancia pa su Excelencia participa na actividadnan social pa asina mantene e contacto estrecho cu nos pueblo y pa mantene e atencion pa e inkietudnan di nos pueblo.

Den nomber di Parlameno y pueblo di Aruba en general Wyatt-Ras a felicita Su Excelencia y desea Su Excelencia forsa, energia y sabiduria pa cumpli cu e encargo importante aki. Ela felicita e distinguida señora esposa di Gobernador, yiunan y demas familiares y desea nan pasenshi cu señor Gobernador.  Lesa e comunicado completo aki.