SMAC ta uni na campaña consientisacion #amigodidi

SMAC ta uni na campaña consientisacion #amigodidi

Posted on 01/6/2017 4:15 pm AST | Updated on 01/7/2017 12:46 am AST

ORANJESTAD - Recientemente FADA a tene su Conferencia di Prensa anunciando cu su Campaña di Conscientisacion #AMIGODIDI lo sigui den temporada di Carnaval 63 tambe.  FADA, KPA, Fundacion Zinnia y Departamento di Salud a uni den lunanan final di 2016 pa lansa nan campaña nobo.

#AMIGODIDI ta un campaña cu ta stimula tur esnan cu sali riba nos cayanan di Aruba y sa cu nan ta bay consumi alcohol pa semper apunta un #AMIGODIDI cu ta nifica un chauffeur cu NO ta bou di influencia di alcohol o cualkier otro substancia, pa core auto.

Despues di algun encuentro den luna di december na unda SMAC a haña un mihor bista for di FADA di e problematica di core auto bou influencia y e impacto di e campaña #AMIGODIDI, a yega na un acuerdo. Mirando e importancia y necesidad pa un campaña asina, SMAC a yega na e conclusion cu di un manera of otro kier brinda sosten pa #AMIGODIDI por ta aun mas visibel y presente e temporada aki di Carnaval 63.

Cu hopi placer SMAC ta anuncia cu e Team di FADA conhuntamente cu su voluntarionan lo ta presente den mayoria di actividad y parada di carnaval organisa pa SMAC.  Nan lo tin e oportunidad pa cana den publico pa trece conscientisacion riba coremento bou influencia y con pa evita esaki uzando #AMIGODIDI. Nan lo acerca ambos publico y participantenan pa recorda nan riba e consequencianan negativo y hopi lamentabel cu por resulta di esaki.

SMAC ta consciente cu ta apenas na inicio di un temporada largo di Carnaval cu ta trece cu ne hopi actividad festivo den dia y anochi na unda alcohol lo hunga un rol. Es mas, cu na dado momento e actividadnan aki ta bin tras di otro por ehempel un weekend completo.  Pa e motibo ey, SMAC ta enfatisa pa tene cuenta cu e combinacion di cansancio, come menos o diferente y consumo di alcohol y/o droga den dianan druk di carnaval, lo por trece cu ne consequencia desastroso, mas ainda den trafico.

SMAC y su president Sra. Shannon Henriquez ta yama Bon Bini na #AMIGODIDI. Ta desea FADA y tur esnan envolvi den e campaña, hopi forsa pa e temporada aki di Carnaval 63. Alaves SMAC ta desea Pueblo Carnavalesco un temporada sano, festivo y di goso den Carnaval 63. Fotonan cortesia Chibi van der Hans/Bacchanal.

 

  • Powered by SETAR