Gobernador Boekhoudt conciente di su responsabilidad nobo

ORANJESTAD - Su Excelencia Gobernador Alfonso Boekhoudt a presenta su credencialnan awe na Parlamento. Durante un discurso presenta, Aruba su Gobernador nobo a remarca varios punto, entre nan su responsabilidad como Gobernador, e situacion cu a surgi pa cu su nombracion, y un reconocemento na su antecesornan.  

DESEONAN 

Gobernador a cuminsa cu su deseonan. "Awe na e ocasion di mi prome discurso den e funcion di Gobernador nobo di Aruba, mi ta desea di expresa mi miho deseonan di bon salud y felicidad pa tur esnan presente y henter nos comunidad na ocasion di inicio di un aña nobo. Ohala cu cada famia cu ta forma nos comunidad por sigui desaroya nan bida hunto, cu convivencia, speransa y fe". 

RESPONSABILIDAD COMO GOBERNADOR

Mes momento Aruba su di cuater Gobernador a para keto riba e responsabilidad nobo cu e tin aworaki. "Mi ta haci uso di e ocasion aki pa dirigi mi mes na Staten - y via dje na henter e pueblo di Aruba – pa sigura tur hende cu conforme e promesa cu mi a haci, conforme e Estatuto di Reino Hulandes,  y conforme e Constitucion di Aruba como fundeshi, lo mi eherce mi funcion conscienciosamente na tur momento"

CONFLICTO PA CU NOMBRAMENTO

Notable tabata e hecho cu Gobernador mes a atende cu e asunto cu a pone bira e centro di noticia aña pasa, esta su nombracion. " Lo no a scapa e atencion di esnan cu a sigui e proceso di aserca - cu tanto na Aruba, como na Hulanda, como tambe rond di mi persona - tabata tin discusion tocante e nombracion di Gobernador. 

Mi ta spera cu nos por sera e capitulo aki y habri un nobo, cu vision pa un futuro di colaboracion positivo y constructivo, cu tur entidad y institutonan, den nos democracia parlamentario. Mi ta compromete mi mes 100% pa cu esaki, den linea cu e promesa haci durante mi huramentacion dilanti di nos Rei". 

ANTECESORNAN

Gobernador Boekhoudt a tuma tempo tambe pa reconoce su antecesornan durante su discurso. "E Gobernador ta asumi su encargo den servicio di e comunidad. Mi ta realisa cu door di acepta e funcion aki, mi ta drenta den e pisadanan di mi antecesornan, sr. Felipito Tromp (den feliz memoria), sr. Olindo Koolman y sr. Fredis Refunjol. Nan a demostra servicio importante na Aruba y na nos Reino, y nan merece e agradecimento incesabel di nos pueblo di Aruba". Mas despues a toca temanan mas serca di su curason, cu tambe a haya un bon acogida cerca esnan presente den Parlamento. Lesa e discurso completo aki.