Fazio: Varios proyecto ta poniendo nos aeropuerto luci miho

ORANJESTAD - Aeropuerto Reina Beatrix ta den proceso pa termina algun proyecto importante proximamente, pa despues nan sigui cu algun mas grandi. Un tras di otro nan ta aparece, manera e frankisia nobo di Juan Valdez cu a habri dia di pasco, y tin un lugar di F&B ta den desaroyo entre porta di salida 4 y 5. Tin e parti di vloer nobo pa imigracion. "Nos ta hopi contento cu esaki" Fazio a bisa. 

CAMBIO DI VLOER NA IMIGRACION 

A resulta cu tapijt na e area ey no ta esun mas practico. Ta un tipo di material cu ta wordo usa cu practicamente no mester di mantencion, ta diseña pa area di hopi trafico. A kita tur e boothnan di imigracion y a pone boothnan nobo cu ta diseña pa propio personal di imigracion. Esey ta pone cu tin mas lugar pa rij, mas espacio, mas E gate (imigracion electronico) pa nan ta mas productivo. Cu e proyecto aki completa, imigracion ta cla pa e proximo añanan sigur. E proyecto for di 1 di september a keda den ehecucion unda cu un 1/3 parti na cada momento tabata tapa. A move esaki den tres diferente fase. Dentro di 10 dia posiblemente e parti nobo di imigracion lo keda completa. Unabez cu e ta cla, e ta duna un ambiente mas sano pa traha aden. Si bo tin entre 5 pa 7 mil pasahero yegando tur dia, no ta keda tempo casi pa haci mantencion riba e tapijt. Transporta maleta, rolstoel riba tapijt simplemente no ta practico. Y e transito di imigracion pa e parti di maleta tambe ta mas facil y practico. 

DOUANE 

Den e area di douane ta creando un espacio cu ta miho utilisa compara cu e parti awor, sigur pa machine Xray, cu asina douane por haci un trabou mas efectivo, dunando nan miho forma pa traha tambe.