Hepple: Proceso canando pa completa directiva di ATA

ORANJESTAD - Aruba Hotel & Tourism Association ta den proceso pa haya e miembronan cu falta pa cera e cantidad necesario pa directiva di ATA. Despues cu tabatin problema anteriormente cu dado momento a tranca mahos, cos ta parce di ta drechando. CEO di AHATA Jim Hepple no kier bay asina leu pa bisa cu ta e cambio di minister tabata instrumental pa esey sosode, pero ta mustra cu cosnan ta canando awor. Den e proceso, e ta mustra cu a topa cu prome minister Mike Eman y minister nobo di turismo Mike de Meza y practicamente henter e gabinete. "Nos ta cla pa topa cu minister pa discuti con pa sigui dilanti" Hepple a bisa. Pues cos ta canando atrobe. E no por a duna un indicacion si, cuanto tempo mas lo dura prome cu e situacion di directiva completo keda resolvi. 

CAMBIO DI MINISTER DI TURISMO

Pa loke ta e cambio di persona como minister di Turismo, Hepple ta bisa di a nota e cambio di personalidad. "E la aserca nos y nos a acerc'e y nos ta spera cu moviendo dilanti, lo tin un espirito di cooperacion y sosten mutuo. "Den e termino cu nos ta traha y cu e (de Meza) ta traha. Tambe minister di economia tambe a indica cu elo ta extensivamente envolvi den turismo. Esey lo beneficioso pa tur hende. 

PROBLEMA ENTRE AHATA, ATA Y MINISTER

Por corda ainda con aña pasa dado momento e relacion entre gobierno (minister Otmar Oduber) y AHATA tabata asina malo cu e representantenan di AHATA den e directiva di ATA a retira 'en bloc' como protesta con cos tabata bayendo den ATA. Esey a inicia un intercambio publico di aviso unda cu cada banda tabata splica nan banda. Cu e intencion di cambia ley di all inclusive despues, esey no a yuda e causa y aki mas y mas e relacion entre AHATA y e minister, riba e dos temanan ey (all inclusive y maneho di ATA) a empeora. Na final di dia, e minister a logra pasa e ley di all inclusive contra deseo di AHATA, e board di ATA a keda incompleto, y finalmente e minister mes a retira di su funcion. Tempo lo bisa con diferente cos lo bay aworaki.