Muyale: Apela sentencia pa revoca bancarota Tiara Air

ORANJESTAD - E intencion di Tiara Air ta pa apela e sentencia recien di huez pa no revoca e bancarota di e compania. Doño di e compania Alejandro Muyale a confirma na NoticiaCla.com diaranson cu esey ta e intencion awor, y esey a keda palabra cu e curator cu ta encarga cu e bancarota, esta Eugene Martis. Mirando cu e compania no ta gastando placa sino mas bien tin placa pa haya, tin cu haci tur esfuerso pa logra haya e placa aki. "Nos ta bay continua cu e intencion pa convence e huez pa reverse e desicion di bancarota. Mi ta spera cu nos por logra esey" Muyale ta bisa. 

CASO PERDI

Den e caso cu recientemente e curator a perde pa revoca e sentencia di bancarota, huez a mustra cu no por a presenta ningun scenario diferente cu a keda presenta caba cu por a mustra mehoransa y speransa pa Tiara Air. Esey a pone cu e huez durante e ultimo caso, no a mira motibo pa honra e peticion di e abogado. Ora cu a puntra Muyale kico diferente lo por presenta aworaki cu no a wordo presenta, y si tin un scenario pues otro, ela bisa cu no. E situacion ta manera cu e ta. Loke ta pone cu no obstante esaki, Muyale ta kere cu tin chens toch, ta logica. Logica cu huez tambe tin cu wak, cu tin hopi placa pa haya, e placa t'ey, Venezuela a priminti pa paga esaki. No ta logico segun Muyale, pa no duna un chens pa recupera e placa aki. De hecho, Muyale a mustra cu di e por lo menos 20 miyon florin pega a Venezuela, 15 miyon ta bin pa comercio y gobierno di Aruba. Pues ta placa cu Aruba merece pa haya bek. 

RECONSIDERA POSICION

Muyale a haci un apelacion atrobe na e grupo di 6 ex trahado cu a hibe corte, pa reconsidera nan punto. Nan ta un grupo chikito di ex trahado contra 143 cu si ta pro (Tiara Air) y si ta wardando, y no kier manda e compania bancarota y pa nan tambe ricibi nan placa. "Mi por compronde e emocion (di e ex trahadonan). Nan ta fada bisa cu tin cu warda hopi tempo. Ban manda e compania bancarota. Pero e logica su tras mi no por wak'e" Muyale a bisa. 

CUMPLI CU REGLA

E CEO ta mustra cu a cumpli cu e regla di e pais, esta bende pasashi den e valuta di e pais, y a cumpli cabalmente cu e acuerdonan bilateral cu tin entre e dos paisnan. Esey ta bisa cu bo Banco Central di cada pais mester percura pa e fondo wordo cambia segun e cambio oficial legal bek pa e pais di unda e compania ta. "Nos a cumpli cu e reglanan. Tur cos ta registra legal. Mi ta kere fiel cu nos merece pa e cen bin bek Aruba" Muyale a sigui bisa. E ta mustra cu e compania a presta servicio na un cantidad di destinacion, cu a duna credito na Tiara, cu e promesa cu e placa lo a bin di Venezuela. "Tur e hendenan aki ta wardando e cen. Kibra e compania pa 6 persona, segun mi no ta husto. No ta eerlijk". Muyale a bisa.