Ley di saco di plastic ta conta pa tur tipo di saco di plastic!

ORANJESTAD - E ley di saco di plastic ta conta pa tur hende, y pa tur saco di plastic. Asina parlamentario Donny Rasmijn a sigura NoticiaCla.com diaranson merdia. Segun e parlamentario cu a lidera e proyecto di ley aki, si bay specifica e materia mas defini, e ta bira un problema mucho complica. Como tal ta un ley tin, y ta nifica cu tur saco di plastic ta cay bou di e ley ey. Grandi, diki, fini. Si e ta di plastic, e ta prohibi.

KINDERZIEKTES

E parlamentario mes momento a mustra su satisfaccion pa cu e proceso y con e ta canando, y ta yama e 'fayonan' cu NoticiaCla.com a trece dilanti den un raportahe awe, como 'kinderziektes'. Na caminda lo refina e situacion y añadi loke mester wordo 'drecha'. E ley tin 4 dia na vigor y ya por mira un reaccion di e comunidad, cu ta varia di aceptacion total, pa rechaso debi cu 'no a wordo informa'. 

NO INFORMA

Un di e problemanan cu a keda raporta, ta cu varios comerciante no ta duna oido na e ley aki ainda pasobra 'nan no a wordo notifica oficialmente cu e ta un ley'. Riba esaki Rasmijn ta hay'e algo straño, ya cu e ley a keda publica oficial segun ley ta prescribi. Ademas, ta mustra cu posiblemente tin un fayo di comunicacion di gobierno cu a pone cu e informacion lo no a yega tur caminda. Pero no obstante esey, Rasmijn ta convenci cu cos ta riba bon caminda. 

SESSION INFORMATIVO

Ela keda di tene un session cu Camara di Comercio y duna asina un presentacion na e miembronan. Tambe a tuma contacto cu personal di e departamento di City Inspector, unda cu aki tambe e comunicacion a faya aparentemente. Mientras cu e departamento aki ta un di esnan encarga cu tene e control, nan no a wordo notifica oficialmente di e asunto aki. Pero ya caba Rasmijn a pone nan na altura y cos ta lorando miho.