Si haya otro lugar, Caribbean Helicentre por sigui

ORANJESTAD -  Pa casi tres aña e operador Hulandes di helicopter HeliCentre ta purbando di set up un operacion na Aruba. For di 2014 e propietario Jeroen Peddemors a lanta Caribbean Helicentre, pero a haya contratiempo algun tempo atras cu a pone nan proyecto 'on hold'. "Nos a focus riba un lugar na Malmok, pero lamentablemente e procedura a para abruptamente" Peddemors a splica. Un grupo di habitante a protesta contra e proyecto, particularmente e disturbio cu esaki lo trece den e bario. Algo cu Peddemors tin tur comprension, pero ta solamente e manera con esaki a sosode, ta lamentabel. "Nos mester a tende for di prensa cu e proyecto a wordo para". E idea ta pa busca un alternativa, y e parti ey ta bezig awor. 

E INTENCION DI E COMPANIA

E intencion di e compania tabata pa un caminda den Caribe Hulandes tin un base pa entrena pilotonan pa helicopter, y banda di esey ehecuta buelonan pa pasahero y turistanan, y tambe wak e posibilidad pa un combinacion cu polis. Peddemors ta confirma cu pa polis tin un helicopter propio ta costoso. "Pero cu un bon combinacion esaki lo mester ta realisabel" Peddemors a sigui bisa, indicando cu nan por ta e alternativa aki. 

PROBLEMA NA ARUBA

Ora cu e compania a cuminsa su tramite algun tempo atras, nan a haya nan mes den problema ora cu un grupo di habitante na Malmok a protesta, cu a pone cu gobierno a para e proyecto. "Despues nos tabatin bon combersacion cu gobierno y a presenta un alternativa. Esey ta nifica solamente si cu nos mester a presenta un plan financiero y organisatorio nobo". Mientrastanto un otro proyecto na Hulanda a haya prioridad riba esun di Aruba. Y esey a pone cu a bin un paro temporal den e proyecto. "Sigur cu nos tin comprension pa e disturbio pa e besindario. Pero ta e forma con cos a sosode y cu nos mester a bin tende for di prensa, cu e proyecto a wordo para, no tabata corecto", Peddemors a sigui bisa. Nan tin bon speransa cu, ayudo y palabracion bon cu gobierno, por logra ainda pa set up e negoshi na Aruba, unda cu tur hende por beneficia di esaki.