Ley contra saco di plastic creando reto nobo na Aruba

ORANJESTAD - E ley nobo cu ta prohibi saco di plastic y cu a drenta na vigor comienso di e aña aki, a cuminsa haya su acohida caba. Pero hunto cu ne, e retonan necesario a yega tambe. Manera ta conoci, entrante 1 di januari no ta permiti mas pa uza saconan di plastic den tiendanan na Aruba. Mientras cu supermercadonan a cuminsa implementa esaki grandemente -completo cu campaña pa motiva compra pa por ricibi saconan re-uzabel gratis a cambio-, tin lugarnan cu ta confundi si e ley ta aplica pa nan tambe. Algun no ta sigur mientras cu otronan ta sigura cu e ley 'no ta pa nos', manera nan a y ta bisando algun persona y clientenan caba. E grupo aki ta cay bou di tiendanan cu no ta supermercado y/ of mini market of restaurant. Y aki tin e dilema awor kico por y kico no por. 

CONFUSION

Ora cu esnan cu a bin cu e ley a specifica riba e uzo di e saconan di plastic pa combestibels na un supermercado, mini market y of un restaurant, no a haci e enfoke asina grandi riba otro tipo di tienda. Esey a pone cu a crea porta e percepcion cu otro tiendanan manera retail (paña, perfume y otro lugarnan), no ta cay den e categoria di 'plastic', pasobra nan ta cay den e rango di saco mas 'solido', aunke cu nan tambe ta traha di plastic. For di e tiendanan cu NoticiaCla.com a atende cu ne, algun a mustra cu nan no ta kere cu e ley ta pa nan, y ta sigui uza e saconan di plastic (mas duro y grandi) sin mas. Otronan no tabata sigur, y no tabata sa si e saconan cu nan tabata uza, y como tal no tabata sa kico pa bisa nan clientenan. Tur esaki mientras cu e ley ta specifica prohibicion pa 'tur saco di plastic'. Pues tambe saconan grandi, mas robusto cu ta wordo uza p.e. na tiendanan di perfume, of di paña. Toch aki e confusion ta reina ainda. 

SUPERMERCADONAN

Esnan cu mas a haya atencion, tabata e supermercadonan grandi cu a mustra enberdad di ta cla pa e introduccion y implementacion di e ley aki. Varios di nan a crea te hasta campañanan ambicioso, unda cu p.e. ta regala saconan re-uzabel cu compra di cada 100 florin. Otronan ta simplemente duna e saconan aki gratis, mientras cu algun ta bende esaki. Mes momento otro companianan a dicidi di uza esaki como un bon ehempel pa propaganda nan producto of compania door di imprimi nan logo riba e saconan re-uzabel, y sea bende of parti nan. Cada biaha cu un persona uza e saco, ta propaganda pa e negoshi. Pues pa e supermercadonan grandi, e ehecucion di e ley no tabata un problema. 

CHINES Y RESTAURANT

Pa loke ta e minimarketnan y algun restaurant, e reto ta mas grandi. Algun Chines cu NoticiaCla.com a bishita, ainda tabata uza e saconan di plastic cu e argumento cu 'nos no a haya notificacion oficial', mientras cu otronan tabata mas drastico, y enberdad a stop di uza e saconan di plastic. Pero mes momento nan no tabata ofrece e cliente un alternativa. Pues esun cu no ta custumbra di cana cu un saco re-uzabel, diripiente a hay'e cu un counter yen di combustibles, sin por hinca nan un caminda. "Ya, nos no ta permiti mas pa uza saco di plastic" e Chines tras di counter tabata bisa e cliente, cu un cara di 'ya, mi no por yuda cu a bin cu e ley ey'. Algun restaurant chikito a haya nan mes cu un situacion cu nan no tabata sa con pa laga e clientenan transporta nan cuminda, pasobra no ta custumbre cu ta hiba cuminda den un saco re-uzabel. Pues varios lugar ainda, y e cliente por lo pronto, a haya nan mes cu un reto nobo cu cambio di aña. Poco poco esaki lo bira un cambio di cultura y cu ohala comberti su mes den un otro 'custumber'.