Participa na e actividad boluntario mas grandi den Reino!

Participa na e actividad boluntario mas grandi den Reino!

Posted on 01/3/2017 10:57 am AST | Updated on 01/3/2017 11:20 pm AST

ORANJESTAD - Riba 10 & 11 di maart 2017 e accionnan di “DOET” ta bolbe tuma luga. E iniciativa di Oranje Fonds aki a start cu NLdoet na Hulanda. Den cooperacion cu organisacionnan local BON DOET, ARUBA DOET, CURA DOET, SXM DOET y STATIA DOET, e ta cosechando hopi exito pa algun aña caba. 

E boluntario ta curason di hopi iniciativa social. Cu e campaña di DOET, Oranje Fonds kier demostra  con importante ciudadanonan activo ta pa comunidad. Pa fundacion y asociacionnan ta un bunita oportunidad pa haci tur sorto di trabou y mara boluntarionan nobo na nan. Naturalmente e actividad ta mustra tambe con dushi trabou boluntario por ta!

Durante actividadnan di DOET algun shen trabou ta keda realisa cerca fundacionnan, institutonan di cuido y asociacionnan na Hulanda y riba 5 isla den Caribe. Tur esaki den dos dia di tempo. Tur hende ta invita pa participa! Den 2016 un total di mas ku 500 trabou a keda realisa y mas ku 6000 boluntario a participa. E organisacion ta spera naturalmente pa den 2017, e actividad atrae mas proyecto y boluntario ainda cu den añanan anterior. Tur fundacion y asociacion por registra un trabou ainda, for di drecha speeltuin, verf centronan di bario te organisa tripnan cu hende grandi. Tur cos ta posibel! Bay riba e website di e diferente islanan pa check e dealine pa registra di cada isla y pa demas informacion. 

Tur hende cu ta dispuesto pa duna un man y kier ofrece un (parti di) dia pa un instituto o asociacion y kier ta parti di e accion boluntario di mas grandi cu tin den Reino, por inscribi. Dor di participa, bo ta cera conoci na un manera dushi y ameno cu trabou di boluntario y na mes momento bo ta yuda un organisacion cu un trabou. For di januari 2017 boluntarionan por cuminsa inscribi pa un trabou. Bou e lema “hopi man ta haci e trabou mas facil” e actividad di DOET ta pone hende pa hunto como grupo pone man na obra como famia, colega, amigo di scol of miembro di un club deportivo pa inscribi hunto pa un trabou. 

Cada aña atrobe masha hopi organisacion y boluntario ta elogia e iniciativa di Oranje Fonds. Boluntarionan cu a participa na e actividad di BON DOET a bisa: “Tabata masha dushi mes y ela duna resultado” y “Famianan por participa tambe y haci di dje un dushi ‘family day’. E boluntarionan y e organisacionnan cu a participa na CURA DOET tambe tabata masha satisfecho cu e actividad: “Nos actividad tabata masha dushi. Mucho mas cu nos mes a spera”, “Tabata pret pa wak cliente y coleganan di trabou traha den e mesun uniform”. E grandinan di Ser'i Otrobanda tabata masha contento tambe cu nan trip pa Banda Bou; hopi di nan tabatin años sin bay eybanda mas. 

Cu sosten di Nationale Postcode Loterij, Nederlandse Loterij y donacionnan di personanan priva y companianan, Oranje Fonds ta inverti casi € 30 miyon na  contribucion financiero directo den mas cu 9000 iniciativa social na Hulanda y den e parti Caribense di Reino. Foto © Oranje Fonds

 

  • Powered by SETAR