Huma toxico di Dump a alcansa Oranjestad diamars mainta!

ORANJESTAD - Apenas un dia despues cu a raporta riba e situacion fastioso na Dump, diamars mainta huma toxico a yega te Oranjestad debi na e biento cu keto bay ta bira. Despues di a tuma nota di e situacion NoticiaCla.com a mobilisa pa e sitio y a tuma nota di e situacion hopi fastioso. Huma tabata claramente haya su caminda pa Oranjestad, pero prome pasando riba Simeon Antonio. Un huma toxico, cu tabata irita bo wowonan, y pone'bo casi stik. E huma tabatin holo di candela, aunke cu e huma mes tabata mas blanco, compara cu e huma preto di candela regular. Fotonan di drone saca tambe a mustra unda exactamente e huma tabata origina riba e dump. E situacion aki ta loke habitantenan di e bario menciona ta pasando aden ta hopi incomodo, pero sobre todo dañino pa salud di esnan afecta. 

E SITUACION APENAS UN DIA PROME 

Habitantenan di Simeon Antonio a habri aña cu problema debi na Dump di Parkietenbos atrobe. Manera informa caba, tabata riba e di dos dia di aña nobo cu NoticiaCla.com a haya notificacion cu den careda di 3'or dialuna full Simeon Antonio tabata hole na quimico y gas procedente di Dump. Loke a haci e situacion hopi fastioso, ta cu e biento a bira, mandando tur e huma fuerte y toxico den direccion di e casnan na Simeon Antonio. Esnan di e area y mas leu manera aeropuerto y Wayaka tambe a keha di esaki. Testigonan cu a bay na e sitio a constata cu tabata trata di huma saliendo for di Dump, pero no origina for di un candela grandi sino e subsuelo di e sero na Dump. Yamada di habitantenan cu tabata keha, no a yuda. A compronde cu bishitantenan di aña nobo mester a bay nan cas, debi na e situacion. A nota cu e biaha aki e holor di e huma tabata mas fuerte cu nunca. 

SITUACION DI DUMP

No ta prome biaha cu e habitantenan ta sufri y keha di e situacion na Dump. Algo prome cu fin di aña e fundacion Parkietenbos a bin dilanti cu nan keho, gobierno a priminti cu lo a haci algo y algo despues, mas habitante a splica NoticiaCla.com tambe di nan experiencia super fastioso. E hecho ta cu gobierno lo a priminti cambio ora cu aña bolter, pero no ta conoci con liher y kico exacto lo sosode pa remedia e situacion cu dia pa dia a bira mas insoportabel.