Gobernador di Aruba ta reacciona riba acuerdo Hulanda - Aruba di diahuebs

ORANJESTAD - Gobernador di Aruba a reacciona riba e situacion cu a surgi for di diahuebs na Aruba. Esaki ta e mensahe textualmente di parti di gobernador di Aruba:

Pa medio di esaki Gabinete di Gobernador di Aruba ta participa lo siguiente

Dia 3 di juli Su Excelencia Gobernador di Aruba a keda informa cu Presidente di Conseho di Ministro di Reino, señor M. Rutte, y Ministro Presidente di Aruba, señor M. Eman, a yega na un acuerdo pa laga haci un investigacion riba Presupuesto 2014 di Pais Aruba, tal manera esaki a keda aproba pa Parlamento di Aruba dia 25 di juni 2014, y pa cua te awe, Gobernador tin su stipulacion pendiente.

Pa contenido di e palabracionnan, di cua e investigacion aki ta forma parti, nos ta referi na e siguiente informe pa prensa cu a prepara tocante e asunto aki.

Relaciona cu e palabracionnan aki y den e mesun liña, Gobernador lo no pasa pa stipula e presupuesto na e momento aki. Tampoco Gobernador lo dicidi pa no stipula e presupuesto, pa cua e ta cualifica como organo di Reino, y basa riba articulo 21 di Regelement van de Gouverneur van Aruba.

Ta te ora cu e ricibi e rapport preliminar cu ta redacta, basa riba e palabracionnan menciona anteriormente, anto e lo reconsidera e decision expresa aki riba, den caso cu e rapport aki ta duna motibo pa esey.

Oranjestad, 4 di juli 2014. ACLARACION Como aclaracion pa redaccion lo siguiente:

Gobernador di Aruba ta stipula Landsverordeningen a base di articulo II.7 di Staatsregeling van Aruba, momento cu e firma esakinan. E ta firma como Organo di Gobierno, como representante di Su Mahestad Rey como hefe di Gobierno di Aruba, y bou responsabilidad di e minister(nan) responsabel di Pais Aruba, kende(nan) tambe ta firma e Landsverordening.

Den Regelement van de Gouverneur van Aruba [Rijkswet van 18 december 1985, laatstelijk herzien bij Wet van 7 juli 2010 (Stb. 2010,339)] tin algun competencia di Gobernador incorpora, cu ta coresponde na dje como organo di Reino.

Den articulo 21 di e Regelement aki tin incorpora cu Gobernador no ta stipula un Landsverordening ora cu e ta considera cu e decreto ta en pugna cu Statuut, cu un reglamento internacional, cu un ley di estado of un medida general di gobierno di reino, of cu interesnan, di cua nan mantenemento of garantia ta un asunto di Reino.

E decision colectivo pa laga haci un investigacion riba Presupuesto 2014 di Gobierno, ta un motibo pa asumi, cu lo por tin motibo pa no stipula Presupuesto 2014 di Gobierno, mediante aplicacion di articulo 21 ya menciona.

Pa motibo cu na e momento aki un decicion di no stipula Presupuesto 2014 di Gobeirno no ta den espiritu di e palabracionnan menciona, Gobernador a yega na e decision pa wanta esaki, aplicando articulo 21, y hunto cune pa no stipula Presupuesto 2014 di Gobierno.

Brevemente resumi e decision aki ta encera pues cu Gobernador ta tene e “no stipulacion” aki, pa cua e ta cualifica, pendiente. Como cu el a tuma e decicion aki den extension di e Regelement van de Gouverneur y cune como Organo di Reino, e decision aki ta cay bou responsabilidad di Conseho di Ministro di Reino.