NoticiaCla.com ta deseabo un Feliz Aña 2017!!!

ORANJESTAD - Aña 2016 tabata uno fructifero y exitoso pa Noticiacla.com. Cu apenas 2 aña y mey di existencia, nos a logra hopi cos. Entre nan un aumento drastico di  siguidornan fiel tur dia, tanto di nos website como medionan social, p.e. facebook. Y si tene na bista e forma con e website ta opera, e cantidad di noticia, e calidad y e impacto cu e tin riba nos bida diario, nos ta hopi orguyoso di a logra asina hopi y yega asina leu den e tempo relativamente cortico. 

COSNAN NOBO DEN 2017

Despues di 2 aña y mey di crece poco poco, ta tempo pa bay mas dilanti ainda y esey nos lectornan lo nota asina cu aña bolter. Varios 'feature' nobo lo keda añadi, di cual e prome ta ya lo ta visibel e prome siman di aña 2017. Pa fin di januari 2017, lo nota e proximo feature y asina lo sigui den 2017. Ta obvio cu tabata necesario pa adapta na e demanda, y asina añadi loke tabata falta ainda. Keda pendiente pa e anuncionan cu lo bin asina aña bolter di tur e cosnan nobo na caminda. 

PATROCINANTENAN

Un gradicimento sigur di curason ta bay pa e patrocinantenan di NoticiaCla.com. Varios di nan (casi mayoria) tabata cu e website for di su comienso na 2014 y ta sigui cu nos den 2017. Otronan a dicidi di uni cu e portal aki den 2016, y pa 2017 e lista ta mustra hopi prometedor. Sin e lista impresionante di patrocinadornan, e exito di e website sigur no tabata posibel. Nan a reconoce calidad y seriedad y a identifica nan mes cu ne. Mester bisa acerca cu e miedo t'ey semper cu patrocinantenan lo ta y of lo por 'domina' e agenda di e contenido. Esaki sinembargo nunca no tabata e caso cu NoticiaCla.com. A trata tur caso den un forma responsabel y esey a keda demonstra tambe durante e 2 aña y mey di su existencia. 

BON DESEONAN

Ta resta solamente pa gradici abo e lector, cu a converti Noticiacla.com como parti di su rutina diario, y ta sigui haci nos aun mas grandi. Na e colaboradornan (nan ta hopi), un palabra di gratitud, pasobra sin boso e trabou lo no por tabata asina grandi. Coleganan den prensa cu a aporta, nos competencia (ta sigui crece tur dia) cu semper a mantene nos skerpi y toch mantene un bon relacion. A prueba cu ora cu trata otro (competencia) cu e respet necesario, y duna credito ora mester, tur hende ta sali gana di esaki. Na nomber di e propietarionan y gerencia di Noticiacla.com, nos ta deseabo un feliz 2017 y cu tur e bon deseonan keda realisa! Nos ta conta cu boso sosten den e aña benidero y lo sigui mantene boso informa manera cu nos a bin ta haci semper. Te otro aña!!!!!