Sospechoso di a comete atraco ta den man di Polis

ORANJESTAD - Ta for di luna di mei ultimo a tuma luga un atraco riba un Chines na San Nicolas, pa cual e ekipo TBP (Team Bijzondere Projecten), conoci popularmente como "Atraco Team" a cuminsa cu un investigacion. Ayera diahuebs pa 9:00 pm a detene e sospechoso den e caso aki, e homber di inicial E.B. conoci como "Rompi" na San Nicolas.

E investigacion a tuma mas tempo cu normal debi cu mester a acumula hopi informacion y detaye pa yega na e sospechoso envolvi posiblemente den e atraco. Den e proceso mester scucha testigonan, evalua evidencia, busca imagennan di tiendanan den vecindario y asina lo por sigui menciona. Pero e investigacion na dado momento a conduci na un conoci di husticia, como e sospechoso di lo a comete dicho acto criminal.

Awe diabierna pa 1:00 pm Fiscal Auxiliar a ordena su encarcelacion oficial, relaciona cu e investigacion cu awor ta cuminsa.