FTA: No ta berdad cu gobierno tin acuerdo cu sindicato riba tarifa Serlimar

ORANJESTAD - Sindicato FTA ta admiti cu nan a pidi comunidad pa no paga e suma mensual cu Serlimar ta pidi pa recoge sushi residencial. Presidente di FTA Hubert Dirksz ta splica NoticiaCla.com cu tanten cu no tin un acuerdo y un claridad di parti di gobierno riba e cambio di tarifa, enberdad nan a pidi pa ningun hende paga Serlimar ainda. Problema pa e sindicato ta cu e tarifa cu ta wordo cobra, ta mucho halto y sigur pa e pensionado. Riba dje, e suma di 25 florin ta mucho hopi y ta mas cu loke e compania mester paga, compara cu e gastonan cu e compania tin. 

TARIFA SOCIAL

Sindicato FTA a sugeri for di comienso di e aña aki un tarifa social na gobierno, sosteni pa e otro sindicatonan di Union Sindical di Aruba (USA). Mes momento ta admiti cu e trahadonan di e compania no mester wordo perhudica pa e situacion aki. "Nos ta kere cu e problema mester wordo atendi den e sentido cu tin un tarifa social pero cu e trahadonan no wordo afecta (financieramente)" Dirksz a sigui bisa. 

GOBIERNO TA RESPONSABEL

Dirksz a recorda gobierno cu nan (gobierno) ta responsabel pa tene Aruba limpi, y FTA ta kere cu e suma cu ta cobra pa recohe sushi residencial ta dimas pa e cartera di e pueblo. "A sugeri pa cobra 0 pa esnan cu ta cobra onderstand, 0 pa esnan cu tin un solo pensioen, esnan cu tin mas cu un pensioen ta paga 10 florin pa luna y e otronan ta paga 15 florin pa luna" Dirksz a bisa. Mientrastanto declaracion haci pa gobierno cu a acorda tarifanan cu sindicato, no ta corecto. "Esey no tabata e caso. Nos ta haya esey hopi incorecto" Dirksz a bisa. Gobierno ta bisa algo y e sindicato ta bisa otro, treciendo aun mas confusion den comunidad. 

SUMA MAS ABOU CU 25 FLORIN

E suma cu gobierno mester pa cubri gasto di Serlimar no ta bal e cobransa di 25 florin pa luna, sino menos segun e sindicato. A manda un carta comienso di aña aki, unda cu gobierno no a contesta. Awor drentando 2017, gobierno a priminti FTA via via pa toca e tema di tarifa social, pero no a bisa nada mas. Despues gobierno a bay prensa pa informa cu nan lo a yega na un acuerdo cu sindicato, siendo cu segun FTA, esey no ta berdad. "Esey nos ta tum'e hopi na malo" Dirksz a bisa. Ta spera cu na  2017 lo yega na un areglo riba esaki.