Prome ley cu lo pasa den 2017: Proteccion 16 areanan di naturalesa

ORANJESTAD - Gobierno pa medio di ley na comienso di 2017 lo proteha e 16 areanan di naturalesa manera determina y aproba pa e mocion di parlamento algun tempo atras. Presidente di Aruba Birdlife Conservation (ABC), Greg Peterson a confirma na NoticiaCla.com den forma di primicia cu gobierno di Aruba a inform'e cu a tuma e desicion pa proteha e 16 areanan. "Esey lo ta e prome legislacion cu lo bay pasa na 2017" Peterson a tende for di prome minister Mike Eman durante un yamada cu Eman a haci na Peterson dia 26 di december ultimo. "Nos ta sumamente contento cu esaki" Peterson a sigui bisa. 

KICO ESAKI TA NIFICA

Peterson a splica cu e proteccion lo sosode pa medio di un landsbesluit houdende algemene maatregel osea Lb H.A.M., y lo cana su trayectoria necesario. E ta nifica cu gobierno lo añadi e 16 areanan aki na Parke Arikok, pues cu e lo cay bou di maneho di e parke. Pa cada un di e facetanan di e 16 lugarnan, mester di un beheerplan pa Parke Arikok. ABC lo yuda cu esaki riba tereno di parha. Sinembargo e lugarnan tin un biodiversidad mucho mas grandi cu solamente parha segun Peterson. Entre nan e parti di mangrove y awa. 

PROYECTONAN DEN CONSTRUCCION

Tin proyectonan cu ta actualmente sea den planificacion of ta den construccion caba, manera esun di Isla di Oro, na Bubali plas y otronan. Segun Peterson su interpretacion, tur esakinan ta cay den e grupo di 16 tereno. "Esun di Bubali ta cay den dje, locual ainda no ta construi no ta wordo construi tampoco. E parti di Isla di Oro, e parti di mangrove lo bira parti di Parke Arikok. "Poniendo un hotel eynan lo no ta posibel, pasobra e lo bay causa daño" Peterson ta bisa. E no sa con e proyecto lo por sigui sin e parti di mangrove.