Plataforma "Ley di Cacho" cu plan integral pa soluciona problema di cacho

ORANJESTAD – Un grupo consistiendo di tur protagonista cu tin di haber cu cacho na Aruba ta preparando un plan pa ataca e problema di cacho na Aruba. E intencion ta pa e ultimo cuartal di e aña aki e plan keda presenta na comunidad, cu e meta final pa por finalmente aplica e ley ‘renova’ di cacho riba nos isla y asina purba soluciona e problema di cachonan ‘sin doño’ y esnan cu tin doño pero cu ta causa problema ‘riba caya’.

Pa por tin un base di apoyo mas amplio, a percura pa incorpora tur instancia cu ta envolvi cu cacho na Aruba, for di veterinarionan, fundacionnan di cacho, centro di refugio di cacho, departamentonan di gobierno manera servicio veterinario, wetgeving, ATA, y entrenadornan di cacho. Hunto nan a forma varios comision cu e fin pa delinea e puntonan necesario pa por tin un efecto mas duradero y structura pa por ataca e problema di cacho.

E prome fase ta poni pa cuminsa e ultimo cuartal di e aña aki cu un campaña di concientisacion, enfoca riba e doñonan di cacho. E meta ta pa concientisa cada doño di nan responsabilidadnan pa cu nan cacho y e consecuencia si no cumpli cu esaki. Unabes cu esaki keda cla, pa comienso di proximo aña, autoridad e ora por cuminsa actua y atende esnan cu ‘viola’ e reglanan segun stipula pa e ley. Esaki por varia entre multanan pa tene p.e. bo cacho riba caya sin correa (leash), maltrato di bestia te na organisa pelea di cacho. Multanan por varia di 100 te na 10.000 florin pa persona of famia cu comete e infraccion.

E problema mas grandi cu kier combati, ta esun unda cu cachonan cu tin doño, diripiente subi caminda y cuminsa causa ‘problema’ na otro cachonan of hende, cu tur su consecuencianan. Door di actua mas responsabel cu e cacho(nan) e doño ta logra bira un doño mas responsabel y consecuentemente e cacho(nan) ta bira cachonan mas agradabel pa maneha. Den curso di e proximo simannan, e plataforma lo sali pafo y splica detayadamente e plannan crea y con esaki lo afecta comunidad.

E interes pa e solucion di e problema aki ta grandi, mirando tambe e efecto cu e tin riba e.o. nos turismo di Aruba. Cachonan ‘sin donjo’ of ‘cu donjo’ ta anda como ‘vagabundo’ riba caya cu tur su consecuencianan. E situacion a bira di alarmante cu tin kehonan di parti di turista cu ta bishita areanan hopi frecuenta manera e hotel strip mes, y centronan comercial. Esey ta nifica cu e cachonan ‘di caya’ ya no ta trafica den areanan remoto, sino a haci nan entrada den lugarnan pobla pa basta tempo caba.

Fuera di ta un peliger pa hende of otro cacho, e cachonan aki ta un mahos bista pa e bishitantenan. Manera e dicho ta bisa, manera bo ta trata bo bestianan, bo ta trata bo hendenan, esaki ta refleha malo riba e imagen di Aruba. Como tal gobierno di Aruba a pone sumanan disponibel pa yuda resolve e problema di cacho na Aruba. Cu e plataforma actual actuando den un forma mas structura, tin indicacion cu e por haya un aceptacion y cu e por tin un chens e biaha aki pa resulta den un solucion mas structural pa e problema aki, aunke esaki por dura algun anda prome cu e ta soluciona completo.3