Mas Rubiano pa Curacao North Sea Jazz e aña aki cu normal

ORANJESTAD – E aña aki e atencion for Aruba pa e festival di Curacao North Sea Jazz a surpasa tur otro aña. E creador di e festival, Gregory Elias a confirma esaki pa NoticiaCla.com. Tambe Elias ta confirma cu tur cos pa e festival ta cla. “Tur permiso ta cla. Tin 250 hende caba cu ta trahando pa acapara tur e aspectonan cu ta bin acerca di seguridad, bus, hotel etc” Elias a sigui bisa. Tin un avalancha di bishitante ta yegando Corsou manera ta e caso e ultimo 4 anjanan. Y pa Elias, esey ta algo bon. Loke mas e ta contento di dje ta pues cu e festival cu ta ranca sali diahuebs proximo, lo conta cu un grupo masha grandi di Rubiano cu ta biahando e dianan aki pa Corsou pa presencia e festival.

Tumando den consideracion cu tur aña Aruba ta bin den montante sumamente grandi, e aña aki tin un aplauso grandi pa Aruba. “E aña aki manera mi ta compronde, Aruba a surpasa tur e otro añanan na montante di hende cu ta biniendo” Elias a bisa NoticiaCla.com. E la haya e informacion aki di e persona responsabel pa Aruba den e festival. “Danki di curason. Manera nos ta bay aki, e ta bay bira dos dia di anochi sumamente memorabel”, Elias a sigui bisa.