DIP: Tin 180 kavel disponibel pa loteria pa carnaval 2017

ORANJESTAD - Entrante 9 di januari 2017 por cuminsa haci peticion pa 180 kavel disponibel. Mientras cu tin 251 kavel, 180 ta bay pa loteria, y e otronan ta wordo uza pa cuminda y otro asunto.  E 'otro asunto' ta entre otro 71 kavel pa vent, radio, tv y fundacion. Asina miembro di management team di DIP, Isabel Dammers a confirma pa NoticiaCla.com.  Departamento di Infrastructura y Planning (DIP) a informa e siman aki. Nan ta e departamento cu ta encarga cu otorgamento di kavelnan pa nos carnaval. Y den cuadro di e tarea ey DIP a publica su calendario pa Carnaval 2017. Tur e actividadnan aki lo tuma lugar den e edificio di infrastructura (INFRA-complex) na Sabana Blanco no. 68. 

BUZONNAN PA PETICION PA KAVEL

Publico carnavalesco lo por cumpra su peticionnan pa kavel na DIP y lo tin 5 buzon pa deposita e peticionnan. Dos buzon pa kavel pa parada grandi na Oranjestad, un buzon pa kavel pa bende cuminda y bebida pa Carnaval na San Nicolas, un buzon pa bende cuminda y bebida pa Carnaval na Noord y un buzon pa bende cuminda y bebida pa Carnaval na Oranjestad. 

FECHANAN IMPORTANTE RELACIONA CU KAVEL

Diaranson 4 di januari 2017 Notario lo seya e 5 buzonnan. Dialuna 9 di januari 2017 te cu diabierna 13 di januari 2017 por cumpra y deposita peticion pa kavel pa Carnaval 2017 na oficina di DIP di 8.00 a.m. pa 12.00 p.m. y di 1.00 p.m. pa 3.30 p.m. Diamars 17 di januari 2017 en presencia di Notario lo saca e nombernan di e personanan cu ta bin na remarca pa un kavel. Lesa e reglamentonan completo pa kavel aki.