Empleadonan di MetaCorp a desea otro Bon Pasco

ORANJESTAD - Durante un evento di Pasco, Chief Executive Officer di MetaCorp, Eddie de Veer a haci uzo di e oportunidad pa expresa su gratitud na e tremendo team di empleadonan di e compania, di cual su subsidiarionan ta un di e dunadonan di trabou mas grandi riba nos isla. 

De Veer a cuminsa bisando cu e celebracion di Pasco ta algo cu MetaCorp ta bin ta organisando pa algun aña caba. “Aña pasa nos a tene e celebracion na ATCO Dakota y e aña aki nos a scoge Balashi Beer Garden. 

E celebracion aki ta unda nos ta trece tur empleado di tur e companianan hunto pa celebra Pasco cu alegria den un forma informal,” e ehecutivo na timon di e compania a indica. Mas leu Sr. de Veer a bisa cu e aña tabata tin su retonan manera tur aña. “Tin retonan cu ta ser logra facil y tin retonan cu ta bin cu un tiki mas esfuerso,” ela agrega.

“Loke mi ta admira, ta cu e empleadonan ta haci nan maximo esfuerso y ta sobresali riba tur cos. Danki na nan nos tin un compania exitoso y tin cu bisa cu e aña aki a bai bon,” asina Eddie de Veer a accentua. Den e mesun rosea Sr. de Veer ta desea pa e fin di aña aki tur hende cuida curpa, celebra cu famia… “y corda cu esaki ta e momento pa refleha y pone boso metanan pa 2017 y habri aña den bon salud.”