Bruno Mars pa CNSJ 2014 ta logro grandi segun Gregory Elias

WILLEMSTAD – E artista principal di e festival di Curacao North Sea Jazz e aña aki ta Bruno Mars. Esaki segun e creador di e concepto di North Sea Jazz pa Corsou, Gregory Elias na NoticiaCla.com. Mes momento e ta clarifica cu e festival di e aña aki no necesariamente mester a bira solamente ‘best of the best’ di e artistanan di e ultimo añanan. “Mi ta kere cu nan a tuma mi palabranan robez” Elias a bisa NoticiaCla.com. E intencion di Elias tabata pa coi di e delaster 4 añanan di festival, posibel 3 di e miho artistanan cu tabatin e miho pedida pa nan, y inclui den e ‘line up’ di e edicion number 5 di Curacao North Sea Jazz Festival. E artistanan aki ta Juan Luis Guerra, Mana y Chaka khan. “E sobranan tur ta nobo”.

Segun Elias, e tabatin wowo riba Bruno Mars for di aña pasa y ya na november di e aña ey 2013, aña a logra firme. “E aña aki sr Bruno Mars tabata e deseo cu mi tabatin pasobra mi a haya asina hopi pedido di no solamente hendenan di mi edad, pero vooral di hubentud y tur sorto di gremio y amante di muziek”. Na februari e (Bruno Mars) tabata e superstar na Superbowl. “Y aworaki e joncuman aki ta esun mas fama di mundo” Elias a sigui bisa. “Pues nos a bebe awa limpi eynan” Elias a bisa.

E festival ta cuminsa diahuebs awor cu e homenahe na Doble R (Rignald Recordino), sigui pa dos dia di festival cu artistanan manera Mana, Rod Stewart, Juan Luis Guerra, y e superstar di e aña aki, Bruno Mars. E aña aki lo no tin algo ‘specifico’ durante e festival di jazz, fuera di e homenahe na Doble R. “Nada otro nos no a haci cu un cos lo a cambia substancialmente” Elias a sigui bisa.