Polis kier ayudo di comunidad pa resolve caso di atraco

ORANJESTAD - Polis kier ayudo di comunidad pa resolve caso di atraco. Recientemente, pa ta exacto dia 30 di november 2016, dos persona bisti cu helm, di cual un di nan cu arma di candela, a comete atraco riba “Gemstones International” na Brickel Bay Mall. Recherchenan di Atraco Team no a para cu e trabou y awor ta solicita ayudo di comunidad pa por caba di resolve e caso. Actualmente tin dos persona di interes pa e team di investigacion y ta puntra comunidad si por reconoce e dos personanan riba potret. 

OTRO CASO

Otro caso cu a hala basta atencion tabata e intento di atraco riba Hulpbestuurskantoor na Santa Cruz. Den e caso aki un persona den un auto color blanco a purba comete e atraco. Awor recherchenan di Atraco Team ta pidi cualkier persona cu por a mira of cu sa di un auto marca Hyundai modelo "I-10” cu e number A-25132 poni riba dashboard cu e persona en cuestion moviendo riba caminda, pa por fabor yama Atraco Team mesora.

NUMBER DI CONTACTO

Si ta asina – den tur dos caso -- por fabor yama e tipline di Polis na 11141 of e Teamchef di Atraco Team na e number 597-5147. Ta gradici di antemano pa e cooperacion y sosten pa soluciona dos caso di atraco.