Varios iregularidad riba prome dia di benta di clapchi

ORANJESTAD - Riba e prome dia di benta di clapchi, varios lugar a confronta problema caba cu mester a keda coregi. "Ya nos a constata den oranan tempran. Tin algun caba cu no ta cumpli, cu ta wordo cera caba" Rubin Ponson como experto di klapchi a bisa NoticiaCla.com diamars merdia. Ponson ta parti di e team cu lo pasa e siman aki pa controla tur establecimento di clapchi pa wak si nan ta cumpli cu regla y ley. "Nan tin cu bay busca (otro lugar) of hala container" Ponson a bisa. 

STICKER PA ALERTA CONTRA PELIGER 

Ademas tabatin varios container sin sticker cu ta indica e carga peligroso. Y sin esaki no por a subi caminda. Ta algo cu hopi persona cu container no a cumpli cu ne. Segun Ponson, ora cu tin transporte di container di clapchi, e container mester tin un sticker oraño di 1.4 cu ta avisa tur departamento riba caya cu tin explosivo den dje. "Esaki ta algo cu varios tabata faya den dje, cu e containernan no por a sali. Esey a pone cu mester a wanta e containernan riba Wela (deposito di container di clapchi) prome cu nan sali. "Mientrastanto esaki a keda resolvi y tur container por a sali riba caya. No ta conoci cuando container a keda reubica pa por a cuminsa bende.

TRANSPORTE DI CLAPCHI

For di marduga (manera ta custumber tur aña) ta cuminsa transporta e containernan di e deposito na Wela pa e respectivo lugarnan di benta di clapchi. Esey ta sosode tur 27 di december, esta un dia despues di e di dos dia di Pasco. For di marduga 3'or ta cuminsa prepara tur cos y pa 4'or ta saca tur container (e aña aki mas of menos 50), y pa merdia mas of menos ta keda cla cu esaki. E ora pa atardi mayoria lugar por ta cla pa nan por cuminsa cu benta di clapchi.