Bermudez ta desmenti cu ‘lazo cu Hulanda’ a pone bira minister

ORANJESTAD – No ta Hulanda a pone Angel Bermudez na e funcion cu e tin aworaki di minister di Finanzas pa pais Aruba. “No cu mi ta na altura“, e mandatario di finanzas nobo di Aruba a sigura NoticiaCla.com . E mandatario di finanzas ta admiti si cu e conoce gobierno hulandes bon, y tin bon amistad cu nan. “Nan conoce mi persona” Bermudez a sigui conta,  y ta pasobra ultimo e la traha pa 3 aña na Bonaire como hefe di belasting pa islanan BES, y a haya un despedida masha bunita. “Pero mi no ta traha mas pa Hulanda” Bermudez a bisa cu un sonrisa.Riba e pregunta directo cu si ta Hulanda a haci apelacion na Bermudez pa e asumi e tarea di minister di Finanzas pa Aruba, e mandatario a contesta “Ningun momento so”.

E rumornan a cuminsa core debi na e relacion tremendo cu Bermudez tin y semper tabatin cu Hulanda. Y cu e situacion manera cu e ta aworaki, Hulanda lo mester tabatin un persona clave pa yude cu e situacion financiero  di Aruba. Y no por a pensa riba un persona miho cualifica y di confiansa, manera cu ta e caso di Bermudez. Pero e mandatario cu a drenta den e funcion recientemente na Aruba como minister di Finanza, a nenga e rumor aki na NoticiaCla.com pero ta compronde e punto si.