Ultimo dia pa tira clapchi ta 1 di januari pa 1 pm

ORANJESTAD - For di awe mainta por cuminsa bende y cumpra clapchi na Aruba. Oficialmente  e regla cu tin ta cu por cuminsa bende clapchi asina cu solo sali dia 27 di december, y por bende te cu 9'or tur anochi te dia 31 di december. Si mira cu tin un grupo di hende ainda cumprando, lo laga nan y lo no haci fastioso. Esnan cu bende, mester haci esaki den un container cu mester ta 4.5 meter di un edificio cu tin porta y bentana, y 7 meter for di caminda. Tin lugarnan cu tin excepcion cu tin cu evalua den cierto caso, segun Ponson. Pa esnan cu ta tira clapchi, por cuminsa haci esaki tur dia for di 27 di december, pero tin te 1 di januari 1'or di merdia cu por tira pa ultimo biaha. Despues di esey, ta prohibi y un persona(nan) por wordo sanciona pa polis.