Grupo di habitante no ta kere den ceramento di Dump

ORANJESTAD – Gobierno ta priminti di poco poco cera e luga di tira sushi di 70 aña di Parkietenbos, conoci como Dump, for di otro aña y san’e. Pero un grupo di habitante kier mira esaki preto riba blanco promer.

“Mi a nace y lanta aki 42 aña pasa. Cada cuater aña nan ta pasa. Partidonan politico, mi a mira tur color pasa for di na chikito. Y tur hende ta bini cu e mesun relato: nos ta bay cera e lugar di tira sushi. “Kiermen sorry, ami no ta kere”, habitante Maribèlle Tromp ta bisa.

Placa pa sanacion

Alan Howell, coordinador di medio ambiente di e minister responsabel Mike de Meza ta bisa cu di berdad ta traha na un plan. Pero e ceramento di e luga di tira sushi lo dura hopi aña ainda, e ta reconoce. Ademas niun caminda, ni den presupuesto, no a reserva placa pa esaki. Pasobra sanacion ta bay costa miyones di florin. “Si gobierno mes no tin e placa, lo e pidi financiamiento. Ki ora esaki lo sosode y ta sigur? Mi no por bisa. Ta politico nan ta. Ta p'esey ta bon cu e habitantenan ta sigui pone presion".

Dolor bieu

Den 70 aña e lugar di tira sushi di Parkietenbos a crece bira un ‘monster’ cu segun e habitantenan di e bario eynan cu yama Simeon Antonio. Den curso di añanan tabatin diferente iniciativa di habitante pa forsa gobierno di bini cu un solucion. Pero te awe esaki no a sosode.

Tromp mes, cu ta traha komo epidemiologo na Directie Volksgezondheid, ta bisa cu e consequencianan pa salud ta riparabel caba: tin mas mucha cu astma den e bario. Su yiu muhe tambe tin astma no di nacemento. “Antes nos tabata laga e bentana habri ora e tabata drumi den su wieg.”

Cancer

E tin un bon amiga tambe cu ta biba den su caya cu tin un forma di cancer poco comun, cu docternan ta kere cu ta contacto cu material toxico ta e causa. Pero no tin un relacion directo entre e luga di tira sushi y enfermedad den bario, Tromp ta admiti. “P'esey mester bini un investigacion tambe. Pero den tur e añanan ey mi no a mira cu na Salubridad Publico ta mira e problema cerca nos como prioridad.”

Tromp y su casa Robert Wever ta conta cu ultimo añanan e situacion a bira insoportabel. Casi tur dia tin candela. Esey ta pasobra no ta parti e sushi y e reaccionnan kimico ta causa candela di mes. Pero esun cu ta maneha e tiramento di sushi, Selimar, mes ta cende e sushi na candela pa traha espacio riba e luga di tira sushi.

“Nos ta pensa di muda”, Wever ta bisa. E ta masha preocupa pa loke nan ta inhala tur dia na material dañino. Nan ta yama polis y brandweer hopi, pero nan no ta bini. “Ta mucho peligroso pa su hendenan, e comandante di brandweer a bisami”, Tromp ta conta. Wever ta bisa cu gobierno no ta tuma e problema basta serio. P'esey hunto cu otro habitante nan a manda un carta caminda nan ta pone Selimar y gobierno responsabel pa daño, entre otro na nan salud.

Autor y foto: Sharina Henriquez  Ret Karibense