'Debatenan riba contenido y no violencia verbal'

ORANJESTAD - Su excelencia Gobernador Fredis Refunjol den su ultimo discurso di Pasco di nacemento, un biaha mas a a toca temanan alcaso diasabra anochi. For di e peticion pa debatenan politico pa nan bay riba contenido y no violencia verbal, pa e peticion pa tin un balansa den construccion pa finnan economico y conservacion di nos naturalesa, te na peticion pa sosten di nos Gobernador entrante mirando e pensamento di nos gobierno riba e tema ey. Na tur, a toca tur tema relevante manera semper Gobernador a sa di haci. 

DEBATE RIBA CONTENIDO OF VIOLENCIA VERBAL?

Cu bista riba e proximo eleccion y mirando e desaroyo den Parlamento durante 2016 pa loke ta e debatenan, Gobernador tabatin un mensahe riba e tema ey. "Mi ta spera sinceramente, cu den 2017, aña di eleccion, cu e debatenan y e campañanan lo por dirigi nan mes riba contenido y riba e retonan, pa cua Aruba ta mira su mes posiciona. Enbes cu debatenan den arena politico como tambe den medionan di comunicacion – unda contenido y e echonan tin biaha a cay afo y wordo remplaza pa e violencia verbal dirigi riba e persona tras di e punto di bista - retonan y scogencianan pa nos generacion y retonan pa nos futuro generacionnan wordo treci dilanti", Gobernador Refunjol a bisa. E ta spera pues cu cosnan por cambia riba e tereno ey. 

CONSTRUCCION SIN MAS OF PA COMUNIDAD

Un di e temanan cu hopi tabata alcaso e aña aki tabata e discusion si gobierno ta simplemente 'construyendo' na Aruba pa finnan economico, lubidando nos comunidad of si ta tene cuenta cu esey tambe. Den e aña nos dilanti tabatin multiple casonan den corte cu a toca e tema di construccion sin mas, riba propiedad di naturalesa, discusion si ta tereno legal etc. Hopi biaha gobierno a mustra cu 'necesidad economico' tabata haci necesario pa duna permiso na cierto areanan. Aki tambe Gobernador a toca e tema. 

" Nos mester sigui construi pa duna e empuhe convencional na actividadnan economico, of nos mester construi pa nos comunidad? Con nos por logra un balansa duradero entre economia y calidad di bida? Por ehempel, pa medio di protege y conserva e tiki naturalesa cu nos tin ainda? Con por combina esaki cu inversionan den seguridad, den cuido hubenil y miho formacion educativo?" nos Gobernador a sigui puntra. 

GOBERNADOR NOBO

Y finalmente, e tema di nos Gobernador nobo. Mientras cu e mensahe ta uno normal unda cu semper ora cu un Gobernador saliente ta pidi sosten pa esun entrante, e biaha aki e tin mas peso mirando e situacion cu a surgi cu e Gobernador nobo. Gobierno a declara esun entrante guera frontal, y a crea un scenario 'interesante' ora cu e proximo Gobernador haci su entrada na januari proximo. Aki tambe, Gobernador a manda su mensahe cu mester sostene e Gobernador entrante. " Otro aña e di cuater Gobernador di Aruba, señor Alfonso Boekhoudt, lo dirigi su mes na boso. Mi tin tur confiansa den mi sucesor. Mi ta spera cu boso lo brind’e e mesun apoyo y confiansa cu boso a brinda mi durante e ultimo diesdos añanan" Gobernador a bisa finalmente. Lesa e texto di e discurso completo aki. Y pa e version televisa, mira e discurso aki.