Funcion ‘nobo’ pa Juan David Yrausquin ainda no ta determina

ORANJESTAD – Juan David Yrausquin no ta bira e ‘Chief of Staff’ di actual minister di finanza Angel Bermudez. E mandatario di finanzas a confirma na NoticiaCla.com cu mientras cu e la haci un apelacion na su ‘ex’ hefe, esaki ta mas den cuadro di asisti den un forma otro, pero cu esey no ta nifica cu e lo bira un ‘miembro di staff’, ni tampoco su Chief of Staff’. “No. absolutamente cu no!” Bermudez a contesta NoticiaCla.com riba e punto ey. “Mi a pidiele pa asisti mi den tur loke tabata pending y esey e la priminti mi tambe” Bermudez a bisa. Yrausquin mientrastanto te cu siman pasa tabata cu vakantie ainda y for di e tempo ey, Bermudez no a papia cu Yrausquin mas riba e tema ey. “Mi ta kere cu ta na su persona pa dicidi na ki forma su persona lo kier contribui den e desaroyo aki” Bermudez a bisa.

E tareanan ta hopi unda cu Bermudez mester di su ayudo, y cu esaki por desemboca den trabounan cu ta sigui te den 2015 tambe. “tin basta proyecto cu mester wordo poni riba pia y mi ta spera cu mi por conta cu su sosten” Bermudez a bisa. E mandatario no kier a bay asina leu di duna Yrausquin un titulo. “Pami esey no ta interesante. Loke ta interesante ta su contribucion cu e lo por duna na e gobierno aki”. Loke cu Bermudez a declara pues enfaticamente ta cu no mester asumi cu e rolnan a simplemente cambia.