Tin 50 container yen di clapchi cla pa benta otro siman

ORANJESTAD - Un total di 50 container cu clapchi ta cla pa subi caminda otro siman diamars pa distribucion y pa despues wordo tira. Experto di explosivo pa Dienst Openbare Werken (DOW) Rubin Ponson a splica NoticiaCla.com cu diamars cu salida di solo, por cuminsa bende y ta stop benta di clapchi dia 31 di december pa 9'or di anochi. Ayera tur tramite na e deposito di clapchi na Wela a keda cla, y ta wardando dia 27 di december yega pa tur e containernan keda transporta pa nan puntonan di benta. Na tur tin un averahe di 80 punto di benta e aña aki segun Ponson, cu ta normal pa aña. 

CLAPCHI

E aña aki un total di 21 container cu clapchi a yega Aruba, y hunto cu e 3 containernan di aña pasa, tin 24 container completo. Esakinan a keda reparti den containernan cu tabata riba wela (varios bashi) y awor tin 50 container pa e respectivo bendedornan. E intencion ta pa diamars marduga 4'or cuminsa cu e distribucion di e varios containernan pa nan respectivo lugarnan. Ponson ta kere cu pa 9'or di mainta caba nan lo ta cla cu e distribucion. Esey ta pone cu depende con liher e lugarnan ricibi nan mercancia, nan por cuminsa habri pa benta. Manera semper e cantidad di punto di benta por varia pasobra no ta semper tur esnan cu a 'inscribi' ta realmente keda cla pa bende. 

REGLANAN 

Entre e reglanan cu tin ta cu por cuminsa bende clapchi asina cu solo sali dia 27 di december, y por bende te cu 9'or tur anochi te dia 31 di december. Si mira cu tin un grupo di hende ainda cumprando, lo laga nan y lo no haci fastioso. Esnan cu bende, mester haci esaki den un container cu mester ta 4.5 meter di un edificio cu tin porta y bentana, y 7 meter for di caminda. Tin lugarnan cu tin excepcion cu tin cu evalua den cierto caso, segun Ponson. Pa esnan cu ta tira clapchi, por cuminsa haci esaki tur dia for di 27 di december, pero tin te 1 di januari 1'or di merdia cu por tira pa ultimo biaha. Despues di esey, ta prohibi y un persona(nan) por wordo sanciona pa polis.