Pontilius: Prome cu fin di aña ex Aura Casino por ta operacional

ORANJESTAD - Practicamente tin un acuerdo pa e operador 'Island Gaming' habri loke tabata antes Aura Casino cu 26 trahado". Asina mediado di gobierno Anselmo Pontilius a bisa NoticiaCla.com diahuebs merdia. E 18 trahadonan cu no ta cay den e 'team', nan situacion ta otro. Un parti di nan ta di acuerdo pa acepta un oferta di 4 luna di salario versus pago di casi 10 luna inicialmente, y e otronan ta sigui cu nan caso den corte contra e operador. Pues toch tin un solucion na bista pa e situacion cu a dura net un aña, y despues cu Island Gaming a bula afo oficialmente. 

CASINO FORMATO NOBO

Segun mediado di gobierno, e casino den un formato nobo mas chikito lo mester ta prepara pa habri den e proximo dianan. Nan lo habri suave, mirando cu nan ta bezig cu nan ekiponan nobo cu tin cu wordo instala. "Nan ta na Aruba caba, pero mester saca nan ainda" Pontilius a bisa. Pa loke ta e rechaso oficial di Island Gaming algun luna pasa, Pontilius a bisa cu a sinta cu nan y cu hotel y cu sindicato pa busca un salida positivo. Tabatin un pre-acuerdo pa huur e casino, pero e parti dificil tabata esun pa acepta e trahadonan y sigur pa loke ta e interpretacion diferente di varios abogado riba e aplicacion di e ley nobo. A logra supera varios obstaculo  segun e mediador. Tabata discusionnan largo cu a resulta cu tin un parti final unda cu partidonan tin cu formalisa e documentonan pa nan wordo firma.