Posibel aumento di biento dialuna lo elimina calor sofocante di Aruba

ORANJESTAD – Aruba a pasa den un fin di siman di hopi calor, combina cu algun yobida di awa cu inicialmente a trece un alivio breve. For di mitar di siman, e comentarionan mas tendi riba nos isla ta cu ta haciendo un calor insoportabel. E motibo segun servicio meteorologico, ta e tormenta Cristobal cu a firma y cu a ‘chupa’ tur e biento bai ariba cune. Esey a pone cu e biento practicamente no tabata presente, y tabata duna un ambiente ‘benaud’. Temperatura di entre 30 pa 35 of mas halto a keda registra na varios caminda den fin di siman. Na aeropuerto p.e. a registra un minimo di 28 grado y maximo di 32 grado celsius, y 6 mm di awa den ultimo 24 ora. Na Hadicurari esaki tabata un minimo di 26 grado y maximo di 34 grado celsius pero nada di awacero.

E prospecto di tempo pa comienso di siman segun servicio meteorologico ta indica cu e biento lo bira gradualmente mas hopi y e temperatura lo fluctua net riba normal. Shelo lo ta parcialmente nubla. E tormenta Cristobal no ta afecta Aruba.