Curator mes a pidi Corte pa revoca bancarota di Tiara Air

ORANJESTAD - Curator cu ta encarga cu e bancarota di Tiara Air, Eugene Martis mes a pidi huez diahuebs merdia pa revoca e sentencia di bancarota di e compania. Considera como algo inusual, Martis a mustra cu e tin suficiente motibo pa e mes pidi esaki, cu bista cu e por soluciona e problema financiero di e compania. Entre nan, haya financiadornan dispuesto pa injecta placa riba cuenta di Tiara na Venezuela, necesario pa logra haya placa bek. Pero pa esey, e financiadornan interesa ta exigi si pa e bancarota wordo revoca. Y segun Martis, tin suficiente motibo cu huez por otorga esey. 

E CASO

E caso a tuma lugar diahuebs merdia, unda cu e abogado/curator a splica huez e situacion di Tiara cu a pone cu a resulta cu huez a dicta e veredicto di bancarota dia 28 di november ultimo. Un di e motibonan ta cu no tin siguransa ki dia e 20 miyon dollar cu Tiara tin pega na Venezuela, lo wordo paga. Martis a splica cu pa por haya e placa bek, kier canbia e bolivarnan den dollars pa por sake for di e pais. Problema ta cu debi na e valuta malo, Tiara no a resta placa riba nan cuenta bancario na Venezuela. Pero Martis a sigura huez cu a haya financiadornan cu ta interesa pa inverti y cumpra bolivars pone riba e cuenta pa asina na su turno por cambia nan na dollars ora cu e permiso di gobierno venezolano wordo otorga. 

TRAHADONAN

Pa loke ta e trahadonan, curator ta mustra cu nan lo a pidi bancarota di e compania, cu speransa cu e curator si lo por logra saca placa for di Venezuela. "Tambe ta claro cu, contrario na pensamento di e trahadonan, nan lo no bin na remarke pa un pago di cesantia debi cu e trahadonan en cuestion no tabata den servicio di e compania ora cu a dicta e bancarota. Ademas, segun e curator, nan peticion pa cu SVB a caduca debi na e tempo cu a pasa. 

SENTENCIA

Mirando cu e termino di revocacion ta uno cortico, e curator mes a dicidi pa pidi esaki. Asina esnan interesa, lo por uni cune den e proceso. Ademas e ta sinti cu tin un bon chens cu e creditornan nan interes lo wordo sirbi si e bancarota wordo revoca. Huez a cera e caso y ta dicta sentencia otro siman diahuebs.