Hassell: Informe di irregularidad na Carubbian Festival ta infunda!

ORANJESTAD - Directiva di Fundacion Carubbian cu ta encarga cu organisa e Carubbian Festival tur diahuebs, a desmenti diahuebs cu tin iregularidad cu cuentanan di e fundacion. "Nos kier relata cu e informacion nan aki ta infunda" John Hasell, presidente di Carubbian Foundation a sigura via un comunicado. "Ningun momento tin un investigacion andando serka e fundacion riba e cuentanan di Carubbian y ningun peticion a ser hasi tampoko" Hassell a sigura. "Carubbian ta refuta tur e alegacionnan sin base y cu ta basa riba mentira pa descredita un maneho sano y responsabel".

CARUBBIAN TA TRAHA TRANSPARENTE

Segun Hasell, Carubbian ta traha transparente y tin tur su papelnan na ordu segun maneho di un contabilidad eficaz. Den un forma transparente e ultimo jaarrekening 2015 a ser traha y geaudit dor di un accountantbureau renombra y tur relato financiero a ser debidamente entrega na e instancianan concerni cu ta Gobierno, TPEF y ATA. 

QUICK SCAN

Na momento cu a instala e board actual na 2014, a laga hasi un quick scan completo y mester menciona cu despues di esaki directiva di Carubbian a sa di sanea e situacion financiero cu awor por bisa cu e fundacion ta uno saludabel. " Den  cuadro di mehoracion pa futuro  a aserka un compania pa hasi un analisis y traha un plan di accion y mercadeo pa 2017 y siguiente añanan y  cu lo ser presenta na e instancianan concerni y Minister di Turismo", Hassell a sigui bisa. 

MALVERSACION DI FONDO

Tocante e informacion infunda treci dilanti dor di diferente media riba cu lo a malversa fondo di fundacion mester enfatisa cu esaki ta falso. "Un prensa obhetivo promer cu saka informacion basa riba rumores ta aserka e instancia pa asina por duna un noticia al caso".

Carubbian ta para tras y duna sosten na tur e artesanonan cu ta ofrece na e turistanan diferente productonan artesanal y tambe na esnan di arte culinario cu ta ofrece diferente cuminda caribense y sigur na tur establecimento den caya.