InselAir a haya 'lifeline' condiciona di gobierno

WILLEMSTAD - Parlamento di Corsou a aproba e mocion pa duna sosten financiero na InselAir International. Cu esaki e compania por sigui opera, mientras cu ta restructura e maneho di e compania pa asina garantisa su existencia. E suma menciona cu lo inverti mientrastanto ta di 15 miyon florin. For di fuentenan cerca di e proceso, NoticiaCla.com a compronde cu a cambio, lo atrae un persona extra di exterior pa durante e periodo specifico, yuda fortifica e directiva actual y pa wak hunto con miho por aloca e fondonan cu gobierno lo injecta den e compania. Entre e acuerdonan tambe ta stipula e debenan pendiente manera cu belasting, pa cual lo bin un areglo di pago cu partidonan a bay di acuerdo cu ne. Tambe ta stipula cu lo mester haya un partner strategico pa e aeroliña aki. 

DIRECTIVA TA HAYA SOSTEN 

Contrario na informacion cu ta circulando, e portal aki a compronde cu no ta asina cu lo 'hala' e actual directornan di e compania manera Edward Heerenveen un banda pa e periodo ey. Ademas e persona cu lo bin asisti e compania, no ta bay fungi como un director. Tur persona actual den directiva lo continua den nan funcion. No mas, cu nan lo haya asistencia (manera indica anteriormente) pa miho aloca e fondonan ricibi. Lo continua cu e plan comercial ya aproba y sigui ehecuta esaki den e miho forma posibel. 

COMISION DI SABIO

Esaki ta resultado di e rapport di sabio cu a keda presenta na parlamento recientemente y cu Parlamento a aproba unanimamente e siman aki. Presentando e situacion real di e compania y su efecto y consecuencia basa riba varios scenario, a opta pa e plan aki, unda cu a resalta cu e existencia di e compania ta mucho importante pa interes general, en bes di laga esaki bay perdi. 

AYUDO FINANCIERO

Manera cu NoticiaCla.com a raporta recientemente, e compania a bati na porta di gobierno di Corsou pa un ayudo. A base di esey a institui un comision di sabio pa investiga e situacion y bin cu un proposicion y presenta esaki na gobierno. Esey a tuma lugar e siman aki. Intento pa haya reaccion di e directornan di e compania manera e.o. Edward Heerenveen no a logra mirando cu nan a firma un None Disclosure Agreement cu ta prohibi nan di duna informacion riba e tema. 

LIFELINE PA ARUBA

Manera cu NoticiaCla.com a raporta tambe, e desaroyo na Corsou tabata importante pa e compania di Aruba esta InselAir Aruba mirando e situacion financiero cu nan ta aden tambe. Durante un caso den corte recientemente unda cu un grupo di trahado a hiba nan doño di trabou corte, InselAir su abogado a confirma cu e desaroyo na Corsou lo ta un 'lifeline' pa e compania na Aruba. Pues si e logra e acuerdo na Corsou, esey ta nifica cu pa Aruba tambe e tin efecto positivo. Na januari lo mester a evalua e situacion di Aruba, pa wak si hues mester intermedia un biaha mas cu un sentencia diferente cu el a dicta recientemente. Recientemente hues a duna InselAir Aruba e beneficio, citando interes general, pendiente e desaroyo di e proximo dos lunanan den cual e compania mester a demonstra nan capacidad pa regla e asuntonan financiero structuralmente.