Grupo di cientifico internacional kier pa tuma accion pa 'caynan' na San Nicolas

ORANJESTAD - Pa Aruba sigui haya reconocemento, manera ta e caso, pa su practicanan di sostenibilidad innovativo na nivel mundial, e gobierno di Aruba tin cu adopta y insisti den un plan serio y conhuntamente regla, pa reconoce e caracteristicanan crucial di diversidad biologico y haya maneranan creativo pa proteha nan pa semper. Y den esaki, ta pidi pa e.o. declara e cinco caynan na San Nicolas como area protehi, y cera e awanan rond di e caynan pa tur forma di uzo humano. Asina un grupo di 84 scientifico a manda bisa gobierno, gobernador y parlamento den un carta di tres pagina recientemente.  

CAYNAN NA SAN NICOLAS

Den e caso di e caynan, unda e parhanan marino ta broei na San Nicolas, e grupo di cientifoco ta sugeri tres accion inicial necesario: 

1. declara oficialmente e cinco caynan situa na San Nicolas, como areanan protegi riba nivel nacional, cu semper lo no ta accesibel pa niun forma di desaroyo humano; 

2. cera e awanan rond di e caynan pa tur forma di uzo humano, excepto pa investigacion y pa monitorea durante e temporada di broei den lente-zomer, na un distancia suficiente grandi, cu por asugura cu no ta stroba e parhanan cu ta broei; 

3. dispone di un presupuesto pa contrata y ta ekipa cu boto y otro ekipo riba un base anual, ideal lo ta cuater (si no dos) cuidado di cay (bou auspicio di Parke Nacional Arikok) pa cuida e caynan contra intruso y disturbio humano y cu tin autoridad di duna boet na esnan cu ta kibra regla tocante disturbio di e caynan. E cuidadonan di cay aki tambe por yuda den monitorea y den e investigacion di e parhanan segun cu ta necesario o desea; 

PAKICO TUMA ACCION

"Como cientifico, nos ta kere cu e caynan unda e parhanan marino ta broei na San Nicolas, ta suficientemente importante pa conservacion di biodiversidad di ful mundo, cu sin intervencion di gobierno di Aruba pa garantisa nan proteccion den un desaroyo cercano, (y e uzo relaciona cu sernan humano) e comunidad ambiental y di conservacion mas grandi di Merca y di ful mundo ta preocupa y lo desea di aumenta concientisacion tocante e tema aki" e grupo ta bisa. Segun nan, Lo ta berguensa pa e reputacion di Aruba keda ofendi como lider den turismo sostenibel, pa e falta aki di planificacion di un di e colonianan di parha marino mas importante di mundo, hunto cu e falta di apoyo gubernamental pa preserva e habitad na e otro areanan natural di Aruba, incluyendo na Bubali. "Nos ta admira hopi e iniciativanan di sostenibilidad cu ya nan a implementa na Aruba, pero nos ta recomenda cu e parti di biodiversidad di e cartera di sostenibilidad di gobierno di Aruba, lo ta eleva na un nivel cu por ta yama lider mundial cu ta di protehe e caynan na San Nicolas y otro area identifica pa Parlamento di Aruba na 2013, como areanan digno di proteccion" e grupo ta sigui bisa. Lesa e carta completo aki.