Corsou mester bira 'The Stage of the Caribbean'

WILLEMSTAD - Corsou mester bira “The Stage of the Caribbean” . Esey a resalta durante e conferencia di prensa e siman aki pa anuncia continuacion di Curacao North Sea Jazz Festival 2017.  Manera cu NoticiaCla.com a raporta caba, despues cu Minister encarga cu Desaroyo Economico sr. Eugene Rhuggenaath a tuma nota di canselashon di Curaçao North Sea Jazz Festival (CNSJF) el a aserca Curaçao Tourism Development Foundation (CTDF) pa check e posibilidadnan pa garantisa continuashon di e evento aki. Esaki a resultá den firmamentu di un memorandum of understanding (MoU) entre CTDF, Curaçao Airport Holding (CAH), Curaçao Investment & Export Promotion Agency (CINEX) huntu ku Fundashon Bon Intenshon (FBI) pa 5 aña entrante 2018. 

E MoU

E  MoU ta enserá lantamentu di un grupo di trabou ku e meta pa liderá e esfuersonan pa sigurá fondo for di stakeholders i/òf otro organisashonnan pa organisá eventonan grandi, entre nan CNSJF. Esaki lo soru pa Corsou keda posishona komo “The Stage of the Caribbean”, un mekanismo fuerte di branding deliñá den e Plan Maestro pa Turismo 2015 -2020. Minister Rhuggenaath tambe a firma na nomber di Gobierno di Corsou. Di acuerdo cu Minister Rhuggenaath “Ta importante pa continua cu e evento aki pa hopi aña mas i trece mas di e tipo di eventonan manera esaki pa crea aktividadnan economico pa nos pais Corsou.”

E delaster encuesta hasi dor di University of Central Florida na aña 2015 ta mustra ku CNSJF tabatin un impakto economico directo i indirecto di riba 15 miyon dollar. E resultadonan di e encuesta ta mustra tambe cu e montante ku e bishitante internashonal na CNSJF ta gasta ta riba 300 dollar pa dia compara cu algo mas cu 100 dollar pa dia di e turista regular cu ta bishita Corsou. 

Ademas por indica cu e cantidad di pasahero cu ta drenta via di e aeropuerto pa dia durante e dianan di e festival ta riba 2000 pasahero compara cu 1000 riba un dia regular. Tur e faktornan aki ta indicadonan importante cu ta hasi necesario pa mantene CNSJF komo un evento icono pa Corsou.  

Otro aspecto positivo di CNSJF ta e conciertonan gratis cu ta krea e plataforma unico pa biahero internashonal keda mas largo riba nos isla i experensia e musica local manera e presentashon di un orkesta filarmóniko presentando piesanan di Doble R i homenahe na Macario Prudencia. Adishonalmente e conciertonan aki ta un manera pa e bishitante intercambia cu e hendenan local i experencia e hospitalidad.