Croes: Subsidio pa Imeldahof aumenta cu mei miyon florin

ORANJESTAD - E subsidio pa Imeldahof a keda aumenta cu mei miyon pa 2017.  Asina minister di asuntonan social Paul Croes a informa recientemente y bolbe confirma den un comunicado diaranson. Segun e mandatario, ta parti di  su afan pa sigui apoya muchanan cu ta bira victima di abuso sexual of negligencia di parti di mayornan iresponsabel. A base di esey a pone mas placa disponibel pa Imelda Hof.  

E SUMA NOBO 

Den presupuesto pa Januari 2017 a pone e suma di awg 3.137.700,00, cu ta un aumento substancial pues di mei miyon florin compara cu e añanan anterior. Tambe por bisa cu ta bay tuma mas trahador den servicio pa garantisa cuido di nivel pa e muchanan. Di e manera aki sector social, specificamente esnan cu ta traha contra abuso di mucha, ta wordo fortifica. 

PRESUPUESTO

E suma di 3.137.700,00 miyon a keda aproba den tratamento di presupuesto 2017 y ta disponibel entrante januari binidero. E siman aki Minister Paul Croes a firma varios decreto legal pa asina hunto cu su colega di finanzas aloca e fondonan necesario pa Imelda hof.