Weekers ta favorece pa Raad van Advies actua como begrotingskamer Aruba

ORANJESTAD – Tin indicacion cu e asina yama ‘begrotingskamer’ cu ta wordo papia ariba como mechanismo di control pa futuro asuntonan presupuestario, por bay resorta bou di Raad van Advies di Aruba. Mientrastanto, aparte di e retiro di minister Juan David Yrausquin, prome cu fin di dia diabierna lo tin claridad adicional ki implicacion e noticia di ayera riba situacion financiero di gobierno lo tin pa nos isla, gobierno y tambe gobernador. NoticiaCla a compronde cu tin reaccionnan oficial ta wordo hinca den otro aworaki y cu dentro di poco esaki lo keda publica. Mientrastanto oficialmente no tin nada ainda for di Hulanda y e reunion di Conseho di Minister di Reino di awe.

 Pa loke ta e asunto di begrotingskamer, NoticiaCla tin informacion cu for di anja pasa ta evaluando e posibilidad pa Raad van Advies tuma e encargo di e control presupuestario. Indicacion pa esaki ta e relacion hopi estrecho cu e ex secretario di estado hulandes pa asuntonan di finanzas Frans Weekers tin cu e departamento aki.

Tabata for di anja pasa november cu Weekers a sinta cu tanto e presidente di RvA e tempo ey y secretario, pa discuti e un ke otro. For di e momento ey ta deliberando e posibilidad pa RvA ta envolvi, aunke no sa ainda den ki forma y con e structura pa esaki lo ta. E concepto di begrotingskamer lo mester bira e mechanismo structural di control pa Aruba. Esaki ta e concepto cu Aruba a ofrece Hulanda pa institui como e mechanismo enves di un College Financieel Toezicht (CFT)

E idea no ta nada nobo ya cu na 2010 caba durante e gabinete interim di Stanley Betrian na Corsou mes a bin cu e intencion di lanta un begrotingskamer. Betrian e tempo ey a sugeri e idea aki na Rijks Minister Raad. Mientras cu nan tabata di acuerdo cu mester a bin cu un idea di CFT, nan no a kere cu e lo mester a wordo haci door di un organo a la CFT, pero usa un organo ya existente. Como ehempel a duna Algemene Reken Kamer, SER, SOAB, Raad van Advies.

Den e cuadro ey, ta mira cu na Aruba lo por usa Raad van Advies pa e trabou aki. Mientras cu nada no ta confirma ainda, e contacto estrecho cu Weekers tin cu Raad van Advies y e hecho cu nan a sinta hunto caba, ta indica cu tin hopi interes pa e organo aki wordo envolvi sea cu un rol primario of por lo menos ta hopi activo den e trayecto di control aki.

NoticiaCla a compronde cu e motibo ta hopi logico, saliendo di e punto di bista cu Raad van Advies ya caba ta gosa di confiansa di Hulanda, ta un organo independiente y ta haci e control y duna conseho caba na gobierno y parlamento riba asuntonan cu ta regarda pais Aruba.