Tres homber latino a secuestra homber y muher den marduga

ORANJESTAD - Un homber y muher a keda secuestra diaranson marduga na altura di Pos Chiquito. Vocero di polis Liliana Rasmijn a confirma cu pa 3:50 awe marduga, a ricibi yamada di bisiñanan na Pos Chikito bisando cu 3 homber a forza un otro (e bisiña) drenta den un auto y bay cune den un chevrolet Optra color shinishi. Dies minuut despues un homber na Savaneta ta pidi Centrale Post pa asistencia di polis. Basa riba e peticion ey a manda polis y ambulance pa e direccion ey. 

STORIA TA CUADRA

Na yegada di polis, un homber ta splica cu algun rato prome tres homber papiando spaño a hinca tanto e como un dama den un auto y bay cu nan. Esey ta cuadra cu e storia di e bisiñanan un rato prome. E homber ta bisa cu un rato despues di e secuestro, el a logra sali for di e auto y a logra busca ayudo na e cas na Savaneta unda cu polis a haye. 

AUTO LOCALISA 

Dos ora despues (6:30am) central di polis a informa cu a haya un auto shinishi para patras di un compleho di apartamento den construccion patras di Brisas del Mar. E number di e auto tabata A 48006. E auto tabata cumpli cu e descripcion di e auto usa pa e secuestro. Sinembargo no a logra haya e dama cu tambe lo a keda secuestra. Mesora polis a manda BFTO (departamento di investigacion) cu a tuma e auto den beslag pa mas investigacion. DAMA NO TA TRAHA NA KIA

Polis a mustra cu no sa ken e dama ta, y cu no ta manera cu otro medionan ta raportando, cu ta trata di un persona trahando na KIA. "Esey no ta berdad" Rasmijn a sigura NoticiaCla.com. Ta pidi pa cualkier informacion cu por tin, pa yama tiplijn 11141. Asina cu tin mas dato, lo suministra esaki tambe.