Xander Bogaerts poni riba lista di ‘hungadornan lesiona’

BOSTON – Aruba su basebolista profesional mas conoci y popular Xander Bogaerts a wordo poni riba e lista di hungadornan lesiona diadomingo, osea e asina yama ‘disabled list’ pa un periodo di 7 dia. Esaki ta a consecuencia di e incidente di diabierna ultimo ora cu e la keda alcansa pa un bala di baseball durante e wega contra Seattle Mariners. 

Mas prome diadomingo, NoticiaCla.com a compronde cu Xander tabata sinti su mes mas miho, aunke cu e no tabata hungando ainda. “E ta sintie bon, pero no ta hungando. E ta na veld si” su mama a splica NoticiaCla.com. Mes momento Bogaerts a manda un mensahe pa NoticiaCla.com indicando cu e la ‘tuma nota di e precupacion demostra pa e incidente cune. Mi ta gradicido pa e atencion y ta manda bisa Dios Danki cu mi ta sintimi miho”.

Tabata diabierna anochi pues ora cu Bogaerts a keda alcansa pa un bala di baseball durante e wega diabierna anochi contra e wega di Seattle Mariners . Tabata den di 6 inning cu e pitcher di Seattle, Hernandez a tira e bala cu a alcansa e parti robes di cabes di Bogaerts. Menos mal cu e tabatin su helm bisti, aunke cu toch un sla asina ta bin duro. Segun mama di Bogaerts, Sandra Brown, a splica NoticiaCla.com, su yiu ta ok, aunke cu despues di e incidente, “Xander a perde su focus un rato”. “Nan a check e up, e no tin un hersenschudding pero nan no a lague hunga awe” Brown a sigui bisa NoticiaCla.com diasabra. Seattle a gana e wega 5-3, y tanto diasabra como diadomingo Bogaerts tabata for di wega. Bogaerts ta e unico hungador arubiano cu ta hungando activamente den Major League Baseball actualmente. Tin mas cu ta den Major Leagues pero ta hungando pa e ekiponan secundario.