Douaneronan ta bolbe bay den accion diaranson mainta

ORANJESTAD - Personal di douane lo reuni diaranson mainta entre 8'or y 11'or pa determina nan proximo paso di accion. Nan a ricibi e contesta di minister Angel Bermudez diamars atardi manera palabra. Pero ora cu hurista di e sindicato SADA a wak e contesta, a resulta cu e no ta loke cu nan a spera. "Abase di esaki nos a manda minister un carta informando e cu nos no ta acepta esaki!' e carta di SADA pa su miembronan ta sigui bisa. 

REUNION MAINTA

Como tal e sindicato a manda un carta pa su miembronan informando nan pa reuni diaranson mainta tempran na SEPPA, "Pa nos dicidi kico lo ta nos proximo pasonan manera cu nos a palabra diabierna mainta", presidente di SADA a bisa. No ta conoci si esaki ta bira e accion y cu e reunion ta envolvi tur trahado. Pero tin tur indicacion cu douane diaranson mainta ta plat.

ACCION SIMAN PASA CABA

Siman pasa caba douaneronan a pidi atencion di minister di Finanza Angel Bermudez , pa vocifera nan preocupacion pa cu e reorganisacion cu segun nan, no ta canando corecto. Despues di a lesa un manifiesto cu ta inclui tur e puntonan di preocupacion, a duna minister te cu awe  20 di december 3'or di atardi pa contesta, sino nan lo a bay den accion e siguiente dia di 8'or di mainta. Minister mientrastanto a acepta e manifiesto, y a priminti e douaneronan cu e lo atende cu nan pa e fecha ey. NOTA: E foto ta di archivo di NoticiaCla.com di siman pasa diabierna ora cu SADA a entrega minister un manifiesto.