Parlamento mester controla Gobierno y ta critico

ORANJESTAD - 'Parlamentarionan mester controla Gobierno y ta critico pa aproba of desaproba legislacion'. Esaki ta un di e temanan cu Su Excelencia Gobernador Fredis Refunjol a toca den su discurso na ocasion di su despedida di Parlamento. E cabes di gobierno a dedica gran parti di su discurso na e funcionamento di Parlamento. "Como ex-politico mi ta compronde hopi bon, cu politica ta cana tin biaha banda di liñanan di partido, cu tumamento di decision ta bay segun puntonan di bista stipula y scogencianan denter di un fraccion" Gobernador a cuminsa na bisa.

COMUNIDAD CHIKITO

Gobernador a mustra di ta conciente cu Aruba ta un comunidad chikito, den cua tur hende conoce tur hende. "Den cua decisionnan trabahoso riba nivel politico, sea como Parlamentario of como Minister, por tin consecuencianan directo pa hendenan cu ta hopi cerca di nos. Tin biaha esaki ta haci dificil pa haci scogencianan y pa defende puntonan di bista" Gobernador a sigui bisa. 

TAREA DI PARLAMENTO 

"Como representantenan di pueblo eligi, ta boso tarea pa independientemente, a base di boso propio formacion di huicio y criterio y a base di boso consenshi, pa haci scogencianan" Gobernador a sigui reitera. "Pueblo a eligi boso pa controla y pa sigui den forma critico, e maneho di gobierno, y pa aproba of desaproba legislacion. Pa boso tarea boso a haya autorisacion y e medionan necesario. Uza nan bon y uza nan den forma corecto". Aki Gobernador a pensa por ehempel riba e derecho parlamentarionan di modificacion (amienda) y riba nan derecho di iniciativa. "Si boso, por ehempel, unanimamente, – y los for di boso color politico – acepta un mocion, anto ta boso tarea pa percura tambe, pa wordo ehecuta" Gobernador a sigui bisa.

DERECHO DI VOTO

Gobernador a para keto tambe riba e derecho di voto. Ela reitera cu e derecho di voto, tanto pa eligi un parlamento of pa worde eligi como miembro di Parlamento, ta un di e derechonan fundamental cu nos tin na Aruba y den nos Reino. "Esaki ta algo cu nos mester ta orguyoso di dje. Nos pais a crece den e ultimo trinta añanan, Aruba a desaroya su mes den e democracia mas hoben, cu ainda nos ta".

POTENCIAL DEN NOS PARLAMENTO

Gobernador a mustra optimista cu nos Parlamento tambe. "Mi ta mira hopi potencial den nos Parlamento y mi ta mira e oportunidadnan, e posibilidadnan, pa sigui crece mas ainda den nos democracia. Cu tur respet pa e diferente rol- y tareanan cu e institucionnan legislativo, hudicial y ehecutivo tin denter di nos pais y denter di nos Reino" Gobernador a finalisa bisando riba e tema di Parlamento den su discurso. Lesa e discurso completo aki.