Gobierno a acorda reduccion coriente cu 6ct pa 2017

ORANJESTAD - Gobierno diamars atardi a acorda reduccion di tarifa di coriente manera a anuncia recientemente. Prome minister Mike Eman a specifica cu e tarifa residencial na januari 2017 lo bira 37ct pa kwh, cu ta un reduccion di 6ct. Mester menciona acerca cu e forma di calcula ta cu esey ta valido pa esnan cu ta uza te 1000kwh pa luna. Teniendo na cuenta cu e gran averahe di comunidad ta usa 750 kwh, esey ta nifica cu un gran parti di nos comunidad segun Eman, lo beneficia di e rebaho aki di 6 ct cu ta 15% cu nan a anuncia. Pa esnan cu ta uza riba 1000 kwh pa luna, e reduccion ta bira 4%. Comercio ta conoce un reduccion di 5% riba nan tarifa di coriente mensual.

COMPARACION CU TEMPO Y OTRO ISLANAN

Eman a mustra cu semper ta bon pa compara no solamente cu e tempo pero tambe cu otro islanan bisiña pa compronde unda nos ta para. Asina a mustra cu na 2012 e tarifa residencial tabata 51ct pa kwh, cu a baha na 2014 pa 43ct  pa kwh cu ta e tarifa actual. Awor esaki ta bira pues 37ct na 2017. Un total di 14 ct for di 2012 pa awor. Y si mira islanan bisiña, Corsou su tarifa residencial actual ta 73ct pa kwh, y Bonaire 70c pa kwh cu ta casi mitar cu loke ta paga na Aruba.