Tjon: Jaarplan KIA lo yuda logra acredita e instituto coreccional porfin

ORANJESTAD -  Korrektie Instituut Aruba (KIA) a traha riba un plan amplio pa cambionan den e instituto coreccional, pero no a elabora mas profundo riba esaki. NoticiaCla.com a acerca e director Rocco Tjon pa un bista pues mas profundo riba e plan aki. "E ta encera hopi" Tjon a confirma pa e portal aki. "Basically e ta ensera pa nos traha pa bira compliant cu norma y criterianan international" e director hoben a sigui splica. Pa por logra esaki  Tjong a busca sosten di Minsterio di Husticia como tambe Ministerio Publico y expertonan di afo. Trahando hunto a bin na un plan cu lo wordo implementa den aña 2017, na februari pa ta exacto.   

MESTER ACREDITA KIA

Tjon a confirma cu manera a bisa caba den pasado, KIA ainda no ta acredita manera mester ta. Y cada bes ora cu instancianan internacional bin, ta remarca riba esaki. "Como organisacion bo ta wordo scrutina door di organisacionnan international riba masha hopi aspecto.Y e jaarplan ta pone e prome pasonan pa nos por bay bira compliant riba tur aspecto". Mes momento Tjon a mustra NoticiaCla.com cu tin cu pone e situacion di 'no ta acredita', bou perspectiva si. Por ehempel Tjon ta mustra cu ta interesante pa sa cu Merca por ehempel tin riba 7000 prison (jail y correction institutions) di cual apenas 300 y pico so ta acredita. "Bo structura di organisacion mester haci'e posibel pa bo por duna contenido na e mission di bo organisacion, cual awo no ta e caso y p'esey nos ta trahando duro pa formalisa e structura nobo comienso di otro aña" Tjon a bisa. Semper ta bon pa pone tur cos den perspectiva.

SEMINARIO

Pa loke ta e forma pa e.o. yega na e cambionan, a organisa un seminario di tres dia unda cu diferente oradornan a presenta e plan na tur esunnan envolvi cu KIA. E trahadonan a scucha diferente angulo di e plan como tambe presentacionnan di expertonan manera Thomas Baker, un experto di University of Central Florida (UCF) riba tereno di criminologia. Otro oradornan presente tabata Minister di Husticia, mr. Drs. Arthur Dowers; PG di Aruba, mr. Alexander van Dam y Jeff Schuller di Dienst Justitiele inrichtingen(Dji) di Hulanda como tambe Director di KIA, Rocco Tjong.

VAN DAM

Procurador General mr. Alexander van Dam a bisa cu KIA ta un di e partnernan mas importante den e cadena di husticia. “E criminalnan cu cay cera na KIA -- danki na Ministerio di Husticia y Ministerio Publico – mester tin un caminda sigur y bon pa keda. Nos ta trahando conhuntamente cu Rocco Tjong na e momentonan aki. E ta trahando riba cambionan grandi pa loke ta e metanan di KIA, profesionalisando e y modernisando e y nos ta dunando e sosten necesario pa logra esaki”. Mr. Van Dam a sigui bisa cu loke cu Rocco Tjong a accentua ta e forma di traha na KIA. Un trabou unda liderasgo y integridad ta hopi importante. “Pero Rocco Tjong no por haci esaki su so,” e procurador a enfatisa. 

E ta sigui splica cu e tin mester di expertonan riba e tereno pa sostene… “y mi presentacion tabata riba liderasgo.” E ta amplia bisando cu mester busca conexion y mester tin focus den loke bo ta haciendo y loke kier… “esaki ta loke e ta encera.” E ta conclui cu esaki ta loke ta importante pa e trahadornan sa pa e sistema por funciona mirando cu ta nan ta e esunnan cu mester por ehecut'e.

JEFF SCHULLER

Jeff Schuller di Hulanda a bisa cu por mira cu e jaarplan 2017 di KIA ta un plan cu un bon vision treci dilanti pa Directie y staf di KIA. E ta brinda hopi perspectiva pa e futuro. “Nos ta sostene KIA cu e creacion di e proceduranan y nos ta haciendo e cu nan. Esaki ta hopi importante y loke e trahadornan ta trece riba mesa te cu awor ta ideanan  hopi positivo,” el a agrega. E modelo Mericano no parce esun Hulandes mucho y e ta kere cu un mix di e diferente estilonan pero cu un toke Arubano ta hopi importante. E programa nobo lo wordo implementa desde februari 2017 y ta spera hopi di dje pasobra cu e ta yuda e trahadornan y duna nan un bon pia pa haci nan trabou mihor y haci Aruba mas sigur. “Esey ta e meta,” e ta accentua. E ta haya cu e seminario tabata algo hopi positivo pa tur esnan envolvi. For di director te na e trahador como tambe ministerio di husticia y ministerio publico.

GREG MADURO

Greg Maduro, bewaker eerste klasse na KIA ta un di esunnan cu a sinti cu loke a wordo presenta den e seminario ta hopi bon mirando cu e ta un intercambio di ideanan di loke ta pasando den prisonnan. “Ta mira cu tin cosnan cu mester wordo drecha", asina Eric Maduro a bisa. Mirando cu ta den reorganisacion e ta haya cu ta bayendo riba e bon caminda. 

E la refleha tambe riba e topico di Thomas Baker bisando cu loke e la bin cu ne ta cosnan cu ta pasa akinan tambe, pero riba un escala mas chikito y cu lo por yega na un punto di calidad den KIA. Pa loke ta liderazgo e ta mira cu tin un diferencia aki na Aruba ya cu e comunidad ta mas chikito. “Trainingnan mas specifico den futuro semper lo ta bon bini si e ta aporta na mehoracion di ehecucion di trabou,” e ta conclui.