Partido Democracia Real no a wordo desolvi y lo keda existi

ORANJESTAD - Partido Democracia Real (PDR) no a wordo desolvi y lo keda existi. Asina su lider y fundador Andin Bikker a sigura pa medio di un comunicado diamars mainta. Segun Bikker, PDR a ripara cu cierto grupo den e partidonan tradicional ta spanta cu e union di PDR y POR den e plataforma Forsa Nobo, y nan no a compronde of no kier compronde e protocol y nan ta plama informacion incorecto cu PDR lo a wordo desolvi. "PDR ta existi y lo sigui existi: PDR a drenta den un acuerdo den forma di un protocol pa uni forsa den e eleccion venidero na 2017" Bikker a sigui bisa den e comunicado. "PDR como organisacion ta forma parti integral di esaki; PDR tin por ehempel e derecho pa di su banda trece y propone candidato conhunto y yuda cu formacion, y desicionnan ta wordo tuma conhuntamente. PDR ta keda miembro di International Democrat Union ("IDU") y tin representacion den Parlamento". Na hermana pais Venezuela por ehempel un protocol di union a wordo aplica den e ultimo eleccion pa Parlamento ("Asamblea") caminda partidonan existente den oposicion (manera partido ruman di PDR den IDU, Proyecto Venezuela) a uni bou di un solo capa yama Mesa di Unidad (MUD) y asina a logra gana eleccion di 6 di december 2015. PDR ta lamenta cu oponentenan cu ta sostene partidonan tradicional ta purba malinforma pa trata na crea discordia. Obviamente nan ta preocupa cu e potencial enorme di e union PDR/POR den e plataforma Forsa Nobo, sino nan no lo ta worry asina tanto cu e union historico aki.