Total di 5 ley aproba den Parlamento den un dia!

ORANJESTAD - Considera como un 'novum' Parlamento a aproba un total di 5 ley dialuna ultimo, pa asina Parlamento por bay cu reces diaranson awor. Presupuesto di Raad van Advies, presupuesto supletorio, e ley cu ta regla e instalacion di diferente ministerionan, e cuenta annual di aña 2015 y e cambio den impuesto di vehiculonan. Oposicion a protesta e accion aki indicando cu no ta corecto pa bulldoze cantidad di ley asina riba un solo dia, faltando tempo di preparacion. 

FONDO RESTANTE PA OTRO POST

E amienda presenta dor di fraccion di AVP unda ta pasa un suma di e presupuesto di Staten cu a resta riba e post di “kosten” pa e post di inversionnan, a keda aproba unanimamente. Segun presidente di Parlamento Mervin Wyatt Ras a opta pa e cambio paso Parlamento a resta placa di gastonan di aña 2016 y kier haci uzo di esakinan pa inverti den diferente proyecto importante manera airco, seguridad den Parlamento y IT. Wyatt-Ras a keda satisfecho cu e desaroyo aki unda e fraccion cu ta sostene gobierno y oposicion a mira e interes di pais na promer lugar. Mientras cu oposicion a protesta e rapidez pa trata e leynan tur hunto, Wyatt Ras ta bisa cu di e forma aki Parlamento di Aruba ta cumpli cu ley di comptabilidad y dor di pasa e diferente leynan aki na tempo ta cumpli cu e trabou di control di Parlamento ariba gobierno. 

DESPEDIDA DI GOBERNADOR

Presidente di Parlamento a anuncia alaves cu diamars lo tuma despedida di Gobernador den Parlamento.Wyatt-Ras a gradici personal di Parlamento y griffier pa e trabou sublime desplega unda cu sin importa ta skohe pa interes di finalisa trabounan. Na final Parlamento lo tin su reces desde 21 di december 2016 te cu 2 di januari 2017.