Chens cu CNSJF ta sigui toch na 2017 y 2018

WILLEMSTAD  – Curaçao North Sea Jazz Festival (CNSJF) ta sigui normal den 2017 y 2018. Por lo menos asina minister demisionario  Eugene Rhuggenaath (PAR) di Economia a declara na e matutino Antiliaans Dagblad. Segun e mandatario tin un MoU riba mesa cu ta encera tur stakeholders, Fundashon Bon Intenshon y organisacionnan dentro di e sector turistico manera Curacao Tourist Board (CTB) y Curacao Hotel And Tourism Association (CHATA). 

NADA SIGUR AINDA 

Sinembargo di parti di e organisadornan mes, NoticiaCla.com a compronde cu nada no ta sigur ainda y cu e siman aki ta spera di por anuncia algo mas concreto. "Nada nada ainda, asina tin algo berdad elo sali riba e website di CNSJ" e fuente den e organisacion a sigura e portal aki. 

CONTINUA CU E FESTIVAL

Pa loke ta e raportahe di e matutino, nan ta cita e mandatario Rhuggenaath cu ta bisa cu e MoU tin cu percura pa e festival mas grandi di musica cu Corsou a conoce, por continua riba un forma duradero. Manera cu NoticiaCla.com a raporta luna pasa, Fundashon Bon Intenshon y Mojo Concerts, organisadornan di e concierto pa e ultimo 7 aña a dicidi cu otro aña no tin festival mas. E motibo duna tabata cu den e periodo cu e festival ta tuma lugar, no lo tabatin actonan principal disponibel. 

VIJVER BASHI

"E vijver di artista ta birando bashi" e hefe grandi Gregory Elias mes a bisa NoticiaCla.com mas tempran e aña aki.  Tambe Elias a confirma na e portal aki cu pa bula artistanan pa Corsou ora cu nan no ta den un gira, ta mucho mas costoso. Bek pa e matutino, loke e mandatario di Corsou a raporta ta cu e reaccion tabata asina grandi y di desapunto, cu a dicidi pa haci tur cos posibel pa mantene CNSJF na bida. E minister mes ta un bishitante fiel pa 7 aña. A manda un carta pa Gregory Elias di Fundashon Bon Intenshon 'y asina e bala a cuminsa core', e matutino ta bisa finalmente. FOTO ARCHIVO NoticiaCla.com di Juan Luis Guerra e aña aki di CNSJF.